Read Nova_Vulgata DC Exodus 27 Bible Online

Exodus 27 - Nova_Vulgata DC bible

Exodus 27

¹Facies et altare de lignis acaciae, quod habebit quinque cubitos in longitudine et totidem in latitudine, id est quadrum, et tres cubitos in altitudine.

²Cornua autem per quattuor angulos ex ipso erunt, et operies illud aere.

³Faciesque in usus eius lebetes ad suscipiendos cineres et vatilla et pateras atque fuscinulas et ignium receptacula; omnia vasa ex aere fabricabis.

⁴Craticulamque facies ei in modum retis aeneam, per cuius quattuor angulos erunt quattuor anuli aenei,

⁵et pones eam subter marginem altaris; eritque craticula usque ad altaris medium.

⁶Facies et vectes altaris de lignis acaciae duos, quos operies laminis aeneis,

⁷et induces per anulos; eruntque ex utroque latere altaris ad portandum.

⁸Cavum ex tabulis facies illud; sicut tibi in monte monstratum est, sic facient.

⁹Facies et atrium habitaculi, in cuius plaga australi contra meridiem erunt tentoria de bysso retorta: centum cubitos unum latus tenebit in longitudine

¹⁰et columnas viginti et bases totidem aeneas et uncos columnarum anulosque earum argenteos.

¹¹Similiter in latere aquilonis: per longum erunt tentoria centum cubitorum, columnae viginti et bases aeneae eiusdem numeri et unci columnarum anulique earum argentei.

¹²In latitudine vero atrii, quae respicit ad occidentem, erunt tentoria per quinquaginta cubitos et columnae decem basesque totidem.

¹³In ea quoque atrii latitudine, quae respicit ad orientem, quinquaginta cubiti erunt,

¹⁴in quibus quindecim cubitorum tentoria lateri uno deputabuntur columnaeque tres et bases totidem;

¹⁵et in latere altero erunt tentoria, cubitos obtinentia quindecim, columnae tres et bases totidem.

¹⁶In introitu vero atrii fiet velum cubitorum viginti, ex hyacintho et purpura coccoque et bysso retorta opere plumarii; columnas habebit quattuor cum basibus totidem.

¹⁷Omnes columnae atrii per circuitum cinctae erunt anulis argenteis, et unci earum erunt argentei et bases aeneae.

¹⁸In longitudine occupabit atrium cubitos centum, in latitudine quinquaginta, altitudo quinque cubitorum erit; fietque de bysso retorta, et habebit bases aeneas.

¹⁹Cuncta vasa habitaculi in omnes usus eius et omnes paxillos eius et omnes paxillos atrii ex aere facies.

²⁰Praecipe filiis Israel, ut afferant tibi oleum de arboribus olivarum purissimum piloque contusum, ut ardeat lucerna semper

²¹in tabernaculo conventus, extra velum, quod oppansum est testimonio. Et parabunt eam Aaron et filii eius, ut a vespere usque mane luceat coram Domino. Perpetuus erit cultus per successiones eorum a filiis Israel.