Read Nova_Vulgata DC Exodus 28 Bible Online

Exodus 28 - Nova_Vulgata DC bible

Exodus 28

¹Applica quoque ad te Aaron fratrem tuum cum filiis suis de medio filiorum Israel, ut sacerdotio fungantur mihi: Aaron, Nadab et Abiu, Eleazar et Ithamar.

²Faciesque vestes sanctas Aaron fratri tuo in gloriam et decorem;

³et loqueris cunctis sapientibus corde, quos replevi spiritu prudentiae, ut faciant vestes Aaron, in quibus sanctificatus ministret mihi.

⁴Haec autem erunt vestimenta, quae facient: pectorale et ephod, tunicam et subuculam textam, tiaram et balteum. Facient vestimenta sancta Aaron fratri tuo et filiis eius, ut sacerdotio fungantur mihi;

⁵accipientque aurum et hyacinthum et purpuram coccumque et byssum.

⁶Facient autem ephod de auro et hyacintho ac purpura coccoque bysso retorta opere polymito.

⁷Duas fascias umerales habebit et in utroque latere summitatum suarum copulabitur cum eis.

⁸Et balteus super ephod ad constringendum, eiusdem operis et unum cum eo, erit ex auro et hyacintho et purpura coccoque et bysso retorta.

⁹Sumesque duos lapides onychinos et sculpes in eis nomina filiorum Israel:

¹⁰sex nomina in lapide uno et sex reliqua in altero, iuxta ordinem nativitatis eorum.

¹¹Opere sculptoris et caelatura gemmarii sculpes eos nominibus filiorum Israel, inclusos textura aurea;

¹²et pones duos lapides super fascias umerales ephod, lapides memorialis filiorum Israel. Portabitque Aaron nomina eorum coram Domino super utrumque umerum ob recordationem.

¹³Facies ergo margines textas ex auro

¹⁴et duas catenulas ex auro purissimo quasi funiculos opus tortile et inseres catenulas tortas marginibus.

¹⁵Pectorale quoque iudicii facies opere polymito, iuxta texturam ephod, ex auro, hyacintho et purpura coccoque et bysso retorta.

¹⁶Quadrangulum erit et duplex; mensuram palmi habebit tam in longitudine quam in latitudine.

¹⁷Ponesque in eo quattuor ordines lapidum: in primo versu erit lapis sardius et topazius et smaragdus;

¹⁸in secundo carbunculus, sapphirus et iaspis;

¹⁹in tertio hyacinthus, achates et amethystus;

²⁰in quarto chrysolithus, onychinus et beryllus. Inclusi auro erunt per ordines suos.

²¹Habebuntque nomina filiorum Israel: duodecim nominibus caelabuntur, singuli lapides nominibus singulorum per duodecim tribus.

²²Facies in pectorali catenas quasi funiculos, opus tortile, ex auro purissimo;

²³et duos anulos aureos, quos pones in utraque pectoralis summitate;

²⁴catenasque aureas iunges anulis, qui sunt in marginalibus eius;

²⁵et ipsarum catenarum extrema duobus copulabis marginibus in fasciis umeralibus ephod in parte eius anteriore.

²⁶Facies et duos anulos aureos, quos pones in summitatibus pectoralis in ora interiore, quae respicit ephod.

²⁷Necnon et alios duos anulos aureos, qui ponendi sunt in utraque fascia umerali ephod deorsum, versus partem anteriorem eius iuxta iuncturam eius supra balteum ephod,

²⁸et stringatur pectorale anulis suis cum anulis ephod vitta hyacinthina, ut maneat supra balteum ephod, et a se invicem pectorale et ephod nequeant separari.

²⁹Portabitque Aaron nomina filiorum Israel in pectorali iudicii super cor suum, quando ingredietur sanctuarium: memoriale coram Domino in aeternum.

³⁰Pones autem in pectorali iudicii Urim et Tummim, quae erunt super cor Aaron, quando ingredietur coram Domino; et gestabit iudicium filiorum Israel super cor suum in conspectu Domini semper.

³¹Facies et pallium ephod totum hyacinthinum,

³²in cuius medio supra erit capitium et ora per gyrum eius textilis, sicut in capitio loricae, ne rumpatur.

³³Deorsum vero, ad pedes eiusdem pallii per circuitum, quasi mala punica facies ex hyacintho et purpura et cocco, mixtis in medio tintinnabulis aureis;

³⁴ita ut sit tintinnabulum aureum inter singula mala punica.

³⁵Et vestietur eo Aaron in officio ministerii, ut audiatur sonitus, quando ingreditur et egreditur sanctuarium in conspectu Domini, et non moriatur.

³⁶Facies et laminam de auro purissimo, in qua sculpes opere caelatoris: "Sanctum Domino".

³⁷Ligabisque eam vitta hyacinthina, et erit super tiaram

³⁸super frontem Aaron. Portabitque Aaron iniquitatem contra sancta, quae sanctificabunt filii Israel in cunctis muneribus et donariis suis. Eritque lamina semper in fronte eius, ut placatus eis sit Dominus.

³⁹Texesque tunicam bysso et tiaram byssinam facies et balteum opere plumarii.

⁴⁰Porro filiis Aaron tunicas lineas parabis et balteos ac mitras in gloriam et decorem;

⁴¹vestiesque his omnibus Aaron fratrem tuum et filios eius cum eo. Et unges eos et implebis manus eorum sanctificabisque illos, ut sacerdotio fungantur mihi.

⁴²Facies eis et feminalia linea, ut operiant carnem turpitudinis suae a renibus usque ad femora;

⁴³et utentur eis Aaron et filii eius, quando ingredientur tabernaculum conventus, vel quando appropinquant ad altare, ut ministrent in sanctuario, ne iniquitatis rei moriantur: legitimum sempiternum erit Aaron et semini eius post eum.