Read Nova_Vulgata DC Exodus 37 Bible Online

Exodus 37 - Nova_Vulgata DC bible

Exodus 37

¹Fecit autem Beseleel et ar cam de lignis acaciae haben tem duos semis cubitos in longitudine et cubitum ac semissem in latitudine, altitudo quoque unius cubiti fuit et dimidii; vestivitque eam auro purissimo intus ac foris.

²Et fecit illi coronam auream per gyrum,

³conflans quattuor anulos aureos in quattuor pedibus eius; duos anulos in latere uno et duos in altero.

⁴Vectes quoque fecit de lignis acaciae, quos vestivit auro

⁵et quos misit in anulos, qui erant in lateribus arcae, ad portandum eam.

⁶Fecit et propitiatorium de auro mundissimo: duorum cubitorum et dimidii in longitudine et cubiti ac semis in latitudine.

⁷Duos etiam cherubim ex auro ductili fecit ex utraque parte propitiatorii:

⁸cherub unum ex summitate unius partis et cherub alterum ex summitate partis alterius; duos cherubim ex singulis summitatibus propitiatorii

⁹extendentes alas sursum et tegentes alis suis propitiatorium seque mutuo et illud respicientes.

¹⁰Fecit et mensam de lignis acaciae in longitudine duorum cubitorum et in latitudine unius cubiti, quae habebat in altitudine cubitum ac semissem;

¹¹circumdeditque eam auro mundissimo et fecit illi coronam auream per gyrum.

¹²Fecit ei quoque limbum aureum quattuor digitorum per circuitum et super illum coronam auream.

¹³Fudit et quattuor circulos aureos, quos posuit in quattuor angulis per singulos pedes mensae

¹⁴iuxta limbum; misitque in eos vectes, ut possit mensa portari.

¹⁵Ipsos quoque vectes fecit de lignis acaciae et circumdedit eos auro;

¹⁶et vasa ad diversos usus mensae, acetabula, phialas et cyathos et crateras ex auro puro, in quibus offerenda sunt libamina.

¹⁷Fecit et candelabrum ductile de auro mundissimo, basim et hastile eius; scyphi sphaerulaeque ac flores unum cum ipso erant:

¹⁸sex in utroque latere, tres calami ex parte una et tres ex altera;

¹⁹tres scyphi in nucis modum in calamo uno sphaerulaeque simul et flores et tres scyphi instar nucis in calamo altero sphaerulaeque simul et flores. Aequum erat opus sex calamorum, qui procedebant de hastili candelabri.

²⁰In ipso autem hastili erant quattuor scyphi in nucis modum sphaerulaeque et flores;

²¹singulae sphaerulae sub binis calamis per loca tria, qui simul sex fiunt calami procedentes de hastili uno.

²²Sphaerulae igitur et calami unum cum ipso erant, totum ductile ex auro purissimo.

²³Fecit et lucernas septem cum emunctoriis suis et vasa, ubi emuncta condantur, de auro mundissimo.

²⁴Talentum auri purissimi appendebat candelabrum cum omnibus vasis suis.

²⁵Fecit et altare thymiamatis de lignis acaciae habens per quadrum singulos cubitos et in altitudine duos; e cuius angulis procedebant cornua.

²⁶Vestivitque illud auro purissimo cum craticula ac parietibus et cornibus.

²⁷Fecitque ei coronam aureolam per gyrum et binos anulos aureos sub corona in duobus lateribus, ut mittantur in eos vectes, et possit altare portari.

²⁸Ipsos autem vectes fecit de lignis acaciae et operuit laminis aureis.

²⁹Composuit et oleum ad sanctificationis unguentum et thymiama de aromatibus mundissimis opere pigmentarii.