Read Nova_Vulgata DC Psalmorum 33 Bible Online

Psalmorum 33 - Nova_Vulgata DC bible

Psalmorum 33

¹Exsultate, iusti, in Domino;rectos decet collaudatio.

²Confitemini Domino in cithara,in psalterio decem chordarum psallite illi.

³Cantate ei canticum novum,bene psallite ei in vociferatione,

⁴quia rectum est verbum Domini,et omnia opera eius in fide.

⁵Diligit iustitiam et iudicium;misericordia Domini plena est terra.

⁶Verbo Domini caeli facti sunt,et spiritu oris eius omnis virtus eorum.

⁷Congregans sicut in utre aquas maris,ponens in thesauris abyssos.

⁸Timeat Dominum omnis terra,a facie autem eius formident omnes inhabitantes orbem.

⁹Quoniam ipse dixit, et facta sunt,ipse mandavit, et creata sunt.

¹⁰Dominus dissipat consilia gentium,irritas facit cogitationes populorum.

¹¹Consilium autem Domini in aeternum manet,cogitationes cordis eius in generatione et generationem.

¹²Beata gens, cui Dominus est Deus,populus, quem elegit in hereditatem sibi.

¹³De caelo respexit Dominus,vidit omnes filios hominum.

¹⁴De loco habitaculi sui respexitsuper omnes, qui habitant terram,

¹⁵qui finxit singillatim corda eorum,qui intellegit omnia opera eorum.

¹⁶Non salvatur rex per multam virtutem,et gigas non liberabitur in multitudine virtutis suae.

¹⁷Fallax equus ad salutem,in abundantia autem virtutis suae non salvabit.

¹⁸Ecce oculi Domini super metuentes eum,in eos, qui sperant super misericordia eius,

¹⁹ut eruat a morte animas eorumet alat eos in fame.

²⁰Anima nostra sustinet Dominum,quoniam adiutor et protector noster est;

²¹quia in eo laetabitur cor nostrum,et in nomine sancto eius speravimus.

²²Fiat misericordia tua, Domine, super nos,quemadmodum speravimus in te.