Read Nova_Vulgata DC Psalmorum 49 Bible Online

Psalmorum 49 - Nova_Vulgata DC bible

Psalmorum 49

¹Magistro chori. Filiorum Core. PSALMUS.

²Audite haec, omnes gentes;auribus percipite, omnes, qui habitatis orbem:

³quique humiles et viri nobiles,simul in unum dives et pauper!

⁴Os meum loquetur sapientiam,et meditatio cordis mei prudentiam.

⁵Inclinabo in parabolam aurem meam,aperiam in psalterio aenigma meum.

⁶Cur timebo in diebus malis,cum iniquitas supplantantium circumdabit me?

⁷Qui confidunt in virtute suaet in multitudine divitiarum suarum gloriantur.

⁸Etenim seipsum non redimet homo;non dabit Deo propitiationem suam.

⁹Nimium est pretium redemptionis animae eius:ad ultimum deficiet,

¹⁰ut vivat usque in finem nec videat interitum.

¹¹Et videbit sapientes morientes;simul insipiens et stultus peribuntet relinquent alienis divitias suas.

¹²Sepulcra eorum domus illorum in aeternum;tabernacula eorum in progeniem et progeniem,etsi vocaverunt nominibus suis terras suas.

¹³Et homo, cum sit in honore, non permanebit;comparatus est iumentis, quae pereunt,et similis factus est illis.

¹⁴Haec via illorum, quorum fiducia in semetipsis,et finis eorum, qui complacent in ore suo.

¹⁵Sicut oves in inferno positi sunt,mors depascet eos;descendent praecipites ad sepulcrum,et figura eorum erit in consumptionem:infernus habitaculum eorum.

¹⁶Verumtamen Deus redimet animam meam,de manu inferi vere suscipiet me.

¹⁷Ne timueris, cum dives factus fuerit homo,et cum multiplicata fuerit gloria domus eius,

¹⁸quoniam, cum interierit, non sumet omnia,neque descendet cum eo gloria eius.

¹⁹Cum animae suae in vita ipsius benedixerit: Laudabunt te quod benefecisti tibi ",

²⁰tamen introibit ad progeniem patrum suorum,qui in aeternum non videbunt lumen.

²¹Homo, cum in honore esset, non intellexit;comparatus est iumentis, quae pereunt,et similis factus est illis.