Read Nova_Vulgata DC Psalmorum 68 Bible Online

Psalmorum 68 - Nova_Vulgata DC bible

Psalmorum 68

¹Magistro chori. David. PSALMUS. Canticum.

²Exsurgit Deus, et dissipantur inimici eius;et fugiunt, qui oderunt eum, a facie eius.

³Sicut dissipatur fumus, tu dissipas;sicut fluit cera a facie ignis,sic pereunt peccatores a facie Dei.

⁴Et iusti laetentur et exsultent in conspectu Deiet delectentur in laetitia.

⁵Cantate Deo, psalmum dicite nomini eius;iter facite ei, qui fertur super nubes:Dominus nomen illi.Iubilate in conspectu eius;

⁶pater orphanorum et iudex viduarum,Deus in habitaculo sancto suo.

⁷Deus, qui inhabitare facit desolatos in domo,qui educit vinctos in prosperitatem;verumtamen rebelles habitabunt in arida terra. -

⁸Deus, cum egredereris in conspectu populi tui,cum pertransires in deserto,

⁹terra mota est, etiam caeli distillaverunta facie Dei Sinai, a facie Dei Israel.

¹⁰Pluviam voluntariam effundebas, Deus;hereditatem tuam infirmatam, tu refecisti eam.

¹¹Animalia tua habitabant in ea,parasti in bonitate tua pauperi, Deus.

¹²Dominus dat verbum;virgines annuntiantes bona sunt agmen ingens:

¹³" Reges exercituum fugiunt, fugiunt,et species domus dividit spolia.

¹⁴Et vos dormitis inter medias caulas:alae columbae nitent argento,et pennae eius pallore auri.

¹⁵Dum dispergit Omnipotens reges super eam,nive dealbatur Selmon".

¹⁶Mons Dei mons Basan,mons cacuminum mons Basan.

¹⁷Ut quid invidetis, montes cacuminum,monti, in quo beneplacitum est Deo inhabitare?Etenim Dominus habitabit in finem.

¹⁸Currus Dei decem milia milium:Dominus venit de Sinai in sancta.

¹⁹Ascendisti in altum, captivam duxisti captivitatem;accepisti in donum homines,ut etiam rebelles habitent apud Dominum Deum.

²⁰Benedictus Dominus die cotidie;portabit nos Deus salutarium nostrorum.

²¹Deus noster, Deus ad salvandum;et Domini, Domini exitus mortis.

²²Verumtamen Deus confringet capita inimicorum suorum,verticem capillatum perambulantium in delictis suis.

²³Dixit Dominus: "Ex Basan reducam,reducam de profundo maris,

²⁴ut intingatur pes tuus in sanguine,lingua canum tuorum ex inimicis portionem inveniat".

²⁵Viderunt ingressus tuos, Deus,ingressus Dei mei, regis mei in sancta.

²⁶Praecedunt cantores, postremi veniunt psallentes.in medio iuvenculae tympanistriae.

²⁷" In ecclesiis benedicite Deo,Domino, vos de fontibus Israel".

²⁸Ibi Beniamin adulescentulus ducens eos,principes Iudae cum turma sua,principes Zabulon, principesNephthali.

²⁹Manda, Deus, virtuti tuae;confirma hoc, Deus, quod operatus es in nobis.

³⁰A templo tuo in Ierusalemtibi afferent reges munera.

³¹Increpa feram arundinis,congregationem taurorum in vitulis populorum:prosternant se cum laminis argenti.Dissipa gentes, quae bella volunt.

³²Venient optimates ex Aegypto,Aethiopia praeveniet manus suas Deo.

³³Regna terrae, cantate Deo,psallite Domino, psallite Deo,

³⁴qui fertur super caelum caeli ad orientem;ecce dabit vocem suam, vocem virtutis.

³⁵Tribuite virtutem Deo.Super Israel magnificentia eius,et virtus eius in nubibus.

³⁶Mirabilis, Deus, de sanctuario tuo!Deus Israel ipse tribuet virtutem et fortitudinem plebi suae.Benedictus Deus!