Read Nova_Vulgata DC Psalmorum 9 Bible Online

Psalmorum 9 - Nova_Vulgata DC bible

Psalmorum 9

¹Magistro chori. Ad modum cantici " Mut labben". PSALMUS. David.

²ALEPH. Confitebor tibi, Domine, in toto corde meo,narrabo omnia mirabilia tua.

³Laetabor et exsultabo in te,psallam nomini tuo, Altissime.

⁴BETH. Cum convertuntur inimici mei retrorsum,infirmantur et pereunt a facie tua.

⁵Quoniam fecisti iudicium meum et causam meam,sedisti super thronum, qui iudicas iustitiam.

⁶GHIMEL. Increpasti gentes, perdidisti impium;nomen eorum delesti in aeternum et in saeculum saeculi.

⁷Inimici defecerunt, solitudines sempiternae factae sunt;et civitates destruxisti: periit memoria eorum cum ipsis.

⁸HE. Dominus autem in aeternum sedebit,paravit in iudicium thronum suum;

⁹et ipse iudicabit orbem terrae in iustitia,iudicabit populos in aequitate.

¹⁰VAU. Et erit Dominus refugium oppresso,refugium in opportunitatibus, in tribulatione.

¹¹Et sperent in te, qui noverunt nomen tuum,quoniam non dereliquisti quaerentes te, Domine.

¹²ZAIN. Psallite Domino, qui habitat in Sion;annuntiate inter gentes studia eius.

¹³Quoniam requirens sanguinem recordatus est eorum,non est oblitus clamorem pauperum.

¹⁴HETH. Miserere mei, Domine;vide afflictionem meam de inimicis meis,qui exaltas me de portis mortis,

¹⁵ut annuntiem omnes laudationes tuas in portis filiae Sion,exsultem in salutari tuo.

¹⁶TETH. Infixae sunt gentes in fovea, quam fecerunt;in laqueo isto, quem absconderunt,comprehensus est pes eorum.

¹⁷Manifestavit se Dominus iudicium faciens;in operibus manuum suarum comprehensus est peccator.

¹⁸IOD. Convertentur peccatores in infernum,omnes gentes, quae obliviscuntur Deum.

¹⁹CAPH. Quoniam non in finem oblivio erit pauperis;exspectatio pauperum non peribit in aeternum.

²⁰Exsurge, Domine, non confortetur homo;iudicentur gentes in conspectu tuo.

²¹Constitue, Domine, terrorem super eos;sciant gentes quoniam homines sunt.