Read Nova_Vulgata DC Proverbiorum 4 Bible Online

Proverbiorum 4 - Nova_Vulgata DC bible

Proverbiorum 4

¹Audite, filii, disciplinam patriset attendite, ut sciatis prudentiam;

²quoniam doctrinam bonam tribuam vobis,legem meam ne derelinquatis.

³Nam et ego filius fui patris mei,tenellus et unigenitus coram matre mea;

⁴et docebat me atque dicebat: Suscipiat verba mea cor tuum,custodi praecepta mea et vives.

⁵Posside sapientiam, posside prudentiam,ne obliviscaris neque declines a verbis oris mei.

⁶Ne dimittas eam, et custodiet te,dilige eam, et servabit te.

⁷Principium sapientiae: posside sapientiamet in omni possessione tua acquire prudentiam.

⁸Arripe illam, et exaltabit te,glorificaberis ab ea, cum eam fueris amplexatus.

⁹Dabit capiti tuo diadema gratiae,et corona inclita proteget te".

¹⁰Audi, fili mi, et suscipe verba mea,ut multiplicentur tibi anni vitae.

¹¹Viam sapientiae monstravi tibi;duxi te per semitas aequitatis,

¹²quas cum ingressus fueris, non arctabuntur gressus tui,et currens non habebis offendiculum.

¹³Tene disciplinam nec laxes;custodi illam, quia ipsa est vita tua.

¹⁴Ne ingrediaris in semitas impiorumnec procedas in malorum via.

¹⁵Fuge ab ea nec transeas per illam;declina et desere eam.

¹⁶Non enim dormiunt, nisi malefecerint,et rapitur somnus ab eis, nisi supplantaverint.

¹⁷Comedunt enim panem impietatiset vinum iniquitatis bibunt.

¹⁸Iustorum autem semita quasi lux splendensprocedit et crescit usque ad perfectam diem.

¹⁹Via impiorum tenebrosa;nesciunt, ubi corruant.

²⁰Fili mi, ausculta sermones meoset ad eloquia mea inclina aurem tuam;

²¹ne recedant ab oculis tuis,custodi ea in medio cordis tui:

²²vita enim sunt invenientibus ea,et universae carni sanitas.

²³Omni custodia serva cor tuum,quia ex ipso vita procedit.

²⁴Remove a te os pravum,et detrahentia labia sint procul a te.

²⁵Oculi tui recta videant,et palpebrae tuae dirigantur coram te.

²⁶Observa semitam pedum tuorum,et omnes viae tuae stabilientur.

²⁷Ne declines ad dexteram neque ad sinistram,averte pedem tuum a malo.