Read Nova_Vulgata DC Sirach 11 Bible Online

Sirach 11 - Nova_Vulgata DC bible

Sirach 11

¹Sapientia humiliati exaltabit caput illius et in medio magnatorum consedere illum faciet.

²Non laudes virum in specie sua neque spernas hominem deformem in visu suo.

³Brevis in volatilibus est apis, et initium dulcoris habet fructus illius.

⁴In vestitu ne glorieris umquam nec in die honoris tui extollaris, quoniam mirabilia opera Altissimi solius, et absconsa et invisa hominibus opera illius.

⁵Multi tyranni sederunt in terra, et insuspicabilis portavit diadema.

⁶Multi potentes exhonorati sunt valide, et gloriosi traditi sunt in manus alterorum.

⁷Priusquam interroges, ne vituperes quemquam, sed, postquam interrogaveris, corripe iuste.

⁸Priusquam audias, ne respondeas verbum et in medio sermonum ne adicias loqui.

⁹De ea re, quae te non molestat, ne certeris et in iudicio peccantium ne consistas.

¹⁰Fili, ne in multis sint actus tui; etsi festinaveris, non eris immunis a delicto: si enim persecutus fueris, non apprehendes, et non effugies, si discurreris.

¹¹Est homo laborans et festinans et dolens et tanto magis non abundabit.

¹²Est homo marcidus egens susceptione, plus deficiens virtute et abundans paupertate;

¹³et oculus Dei respexit illum in bono et erexit eum ab humilitate ipsius et exaltavit caput eius: et mirati sunt in illo multi.

¹⁴Bona et mala, vita et mors, paupertas et honestas a Deo sunt.

¹⁵Sapientia et disciplina et scientia legis apud Dominum; dilectio et viae bonorum apud ipsum.

¹⁶Error et tenebrae peccatoribus concreata sunt; qui autem exsultant in malis, consenescunt in malo.

¹⁷Datio Dei permanet iustis, et beneplacitum illius successus habebit in aeternum.

¹⁸Est qui locupletatur parce agendo, et haec est pars mercedis illius

¹⁹in eo quod dicit: “ Inveni requiem mihi, et nunc manducabo de bonis meis solus”;

²⁰et nescit quod tempus praeteriet, et mors appropinquet, et relinquet omnia aliis et morietur.

²¹Sta in mandato tuo et in illo conversare et in opere mandatorum tuorum veterasce.

²²Ne mireris in operibus peccatorum; confide autem in Deo et mane in labore tuo.

²³Facile est enim in oculis Dei subito honestare pauperem.

²⁴Benedictio Dei in mercede iusti continuo, et in hora veloci successus illius fructificat.

²⁵Ne dicas: “ Quid est mihi opus? Et, quae erunt mihi ex hoc bona? ”.

²⁶Ne dicas: “ Sufficiens mihi sum; et, quid ex hoc nunc pessimabor? ”

²⁷In die bonorum ne immemor sis malorum et in die malorum ne immemor sis bonorum,

²⁸quoniam facile est coram Deo in die obitus retribuere unicuique secundum vias suas.

²⁹Malitia horae oblivionem facit luxuriae magnae, et in fine hominis denudatio operum illius.

³⁰Ante mortem ne laudes hominem quemquam, quoniam in extremis suis agnoscitur vir.

³¹Non omnem hominem inducas in domum tuam, multae enim sunt insidiae dolosi.

³²Sicut enim eructant praecordia foetentium, et sicut perdix inducitur in caveam, et ut caprea in laqueum, sic et cor superborum, et sicut prospector videns casum proximi sui.

³³Bona enim in mala convertens insidiator et in electis imponet maculam.

³⁴A scintilla una augentur carbones, et ab uno doloso augetur sanguis; homo vero peccator sanguini insidiatur.

³⁵Attende tibi a pestifero, fabricat enim mala; ne forte inducat super te maculam in perpetuum.

³⁶Admitte ad te alienigenam, et subvertet te in turbore et abalienabit te a tuis propriis.