Read Nova_Vulgata DC Sirach 15 Bible Online

Sirach 15 - Nova_Vulgata DC bible

Sirach 15

¹Qui timet Deum, faciet haec, et, qui continens est legis, apprehendet illam;

²et obviabit illi quasi mater honorificata et quasi mulier a virginitate suscipiet illum.

³Cibabit illum pane vitae et intellectus et aqua sapientiae salutaris potabit illum, et firmabitur in illa et non flectetur

⁴et confidet in illam et non confundetur; et exaltabit illum prae proximis suis

⁵et in medio ecclesiae aperiet os eius et adimplebit illum spiritu sapientiae et intellectus et stola gloriae vestiet illum;

⁶iucunditatem et exsultationem thesaurizabit super illum et nomine aeterno hereditabit illum.

⁷Homines stulti non apprehendent illam, et homines sensati obviabunt illi; homines peccatores non videbunt eam, longe enim abest a superbia et dolo.

⁸Viri mendaces non erunt illius memores; et viri veraces invenientur in illa et successum habebunt usque ad inspectionem Dei.

⁹Non est speciosa laus in ore peccatoris,

¹⁰quoniam non a Deo tributa est ei; sapientiae enim Dei astabit laus, et in ore sapientis dicetur laus, et dominator illius docebit eam.

¹¹Ne dixeris: “ A Deo peccatum meum ” quae enim odit, ipse non facit.

¹²Non dicas: “ Ille in me impegit ”; non enim necessarii sunt ei homines impii.

¹³Omne exsecramentum erroris odit Dominus, et non erit amabile timentibus eum.

¹⁴Deus ab initio constituit hominem et reliquit illum in manu consilii sui et dedit eum in manum concupiscentiae suae.

¹⁵Adiecit mandata et praecepta sua et intellegentiam ad faciendum placitum eius.

¹⁶Si volueris mandata servare, conservabunt te; si confidis in illo, etiam tu vives.

¹⁷Apposuit tibi aquam et ignem; ad quod volueris, porrige manum tuam.

¹⁸Ante hominem vita et mors, bonum et malum: quod placuerit ei, dabitur illi.

¹⁹Quoniam multa sapientia Dei, et fortis in potentia videns omnes sine intermissione.

²⁰Oculi Domini ad timentes eum, et ipse agnoscit omnem operam hominis.

²¹Nemini mandavit impie agere et nemini dedit spatium peccandi.

²²Non concupiscas multitudinem filiorum infidelium et iniquorum.