Read Nova_Vulgata DC Sirach 23 Bible Online

Sirach 23 - Nova_Vulgata DC bible

Sirach 23

¹Domine, pater et dominator vitae meae, ne derelinquas me in consilio eorum nec sinas me cadere in illis.

²Quis superponet in cogitatu meo flagella et in corde meo doctrinam sapientiae, ut ignorationibus meis non parcant mihi, et non appareant delicta mea,

³et ne adincrescant ignorantiae meae, et multiplicentur delicta mea, et peccata mea abundent, et incidam in conspectu adversariorum meorum, et gaudeat super me inimicus meus?

⁴Domine, pater et Deus vitae meae, ne derelinquas me in cogitatu illorum.

⁵Extollentiam oculorum meorum ne dederis mihi et omne desiderium averte a me.

⁶Aufer a me ventris concupiscentias, et concubitus concupiscentiae ne apprehendant me, et animae irreverenti et infrunitae ne tradas me.

⁷De doctrina oris. Doctrinam oris audite, filii; et, qui custodierit illam, non capietur labiis nec scandalizabitur in operibus nequissimis.

⁸In labiis suis apprehendetur peccator, et maledicus et superbus scandalizabitur in illis.

⁹Iurationi non assuescas os tuum: multi enim casus in illa.

¹⁰Nominatio vero Dei non sit assidua in ore tuo, et nominibus sanctorum non admiscearis, quoniam non eris immunis ab eis.

¹¹Sicut enim servus exquisitus assidue livore carere non poterit, sic omnis iurans et nominans in toto a peccato non purgabitur.

¹²Vir multum iurans implebitur iniquitate, et non discedet a domo illius plaga.

¹³Et, si frustraverit, delictum illius super ipsum erit; et, si dissimulaverit, delinquet dupliciter.

¹⁴Et, si in vacuum iuraverit, non iustificabitur: replebitur enim malis domus illius.

¹⁵Est et alia loquela morti comparanda: non inveniatur in hereditate Iacob.

¹⁶Etenim a timoratis omnia haec sunt remota, et in delictis non volutabuntur.

¹⁷Indisciplinatae turpitudini non assuescat os tuum: est enim in illa verbum peccati.

¹⁸Memento patris et matris tuae, in medio enim magnatorum consistis;

¹⁹ne forte obliviscaris tui in conspectu illorum et assiduitate tua infatuatus improperium patiaris et maluisses non nasci et diem nativitatis tuae maledicas.

²⁰Homo assuetus in verbis improperii in omnibus diebus suis non erudietur.

²¹Duo genera abundant in peccatis, et tertium adducit iram et perditionem:

²²anima calida quasi ignis ardens non exstinguetur, donec consumatur;

²³et homo fornicarius in corpore carnis suae non desinet, donec incendat ignem.

²⁴Homini fornicario omnis panis dulcis: non cessabit nisi in morte.

²⁵Omnis homo, qui transgreditur super lectum suum contemnens in anima sua et dicens: “ Quis me videt?

²⁶Tenebrae circumdant me, et parietes cooperiunt me, et nemo circumspicit me; quem vereor? Delictorum meorum non memorabitur Altissimus ”

²⁷et non intellegit quoniam omnia videt oculus illius, quoniam expellit a se timorem Dei huiusmodi hominis timor. Et oculi hominum sunt timor illius,

²⁸et non cognovit quoniam oculi Domini multo plus lucidiores sunt super solem circumspicientes omnes vias hominum et profundum abyssi et hominum corda intuentes in absconditas partes.

²⁹Domino enim Deo, antequam crearentur, omnia sunt agnita; sic et, postquam perfecta sunt, respicit omnia.

³⁰Hic in plateis civitatis vindicabitur et quasi pullus equinus fugabitur et, ubi non speravit, apprehendetur;

³¹et erit dedecus omnibus, eo quod non intellexerit timorem Domini.

³²Sic et mulier omnis relinquens virum suum et statuens hereditatem ex alieno matrimonio.

³³Primo enim in lege Altissimi incredibilis fuit, secundo in virum suum deliquit, tertio in adulterio fornicata est et ex alio viro filios statuit sibi.

³⁴Haec in ecclesiam adducetur et in filios eius respicietur;

³⁵non tradent filii eius radices, et rami eius non dabunt fructum:

³⁶derelinquet in maledictum memoriam suam, et dedecus illius non delebitur.

³⁷Et agnoscent, qui derelicti sunt, quoniam nihil melius est quam timor Dei, et nihil dulcius quam attendere mandatis Domini.

³⁸Gloria magna est sequi Dominum; longitudo enim dierum assumetur ab eo.