Read Nova_Vulgata DC Sirach 25 Bible Online

Sirach 25 - Nova_Vulgata DC bible

Sirach 25

¹In tribus placitum est spiritui meo, quae sunt probata coram Deo et hominibus:

²concordia fratrum et amor proximorum et vir et mulier bene sibi consentientes.

³Tres species odivit anima mea, et aggravor valde animae illorum:

⁴pauperem superbum, divitem mendacem, senem fatuum et insensatum.

⁵In iuventute tua non congregasti; quomodo in senectute tua invenies?

⁶Quam speciosum canitiei iudicium, et presbyteris cognoscere consilium!

⁷Quam speciosa veteranis sapientia, et gloriosis intellectus et consilium!

⁸Corona senum multa peritia, et gloria illorum timor Dei.

⁹Novem insuspicabilia cordis magnificavi, et decimum dicam in lingua hominibus:

¹⁰homo, qui iucundatur in filiis, vivens et videns subversionem inimicorum suorum;

¹¹beatus, qui habitat cum muliere sensata et non arat in bove et in asino simul; et qui lingua sua non est lapsus, et qui non servivit indigno se;

¹²beatus, qui invenit amicum verum, et qui enarrat iustitiam auri audienti;

¹³quam magnus, qui invenit sapientiam et scientiam, sed non est super timentem Dominum.

¹⁴Timor Dei super omnia excedit;

¹⁵qui tenet illum, cui assimilabitur?

¹⁶Timor Dei initium dilectionis eius; fides autem initium adhaesionis ei.

¹⁷Omnis plaga tristitia cordis est, et omnis malitia nequitia mulieris.

¹⁸Et omnem plagam et non plagam cordis;

¹⁹et omnem nequitiam et non nequitiam mulieris;

²⁰et omnem calamitatem et non calamitatem odientium;

²¹et omnem vindictam et non vindictam inimicorum.

²²Non est venenum nequius super venenum colubri,

²³et non est ira super iram mulieris; commorari leoni et draconi placebit quam habitare cum muliere nequam.

²⁴Nequitia mulieris immutat faciem eius et obscurat vultum eius tamquam ursus. In medio proximorum eius accumbet vir eius

²⁵et invitus suspirabit amare.

²⁶Parva omnis malitia prae malitia mulieris: sors peccatorum cadat super illam.

²⁷Sicut ascensus arenosus in pedibus veterani, sic mulier linguata homini quieto.

²⁸Ne incidas in mulieris speciem et non concupiscas mulieris opes.

²⁹Ira et irreverentia et confusio magna

³⁰mulier, si primatum habeat super virum suum.

³¹Cor humile et facies tristis et plaga cordis mulier nequam.

³²Manus debiles et genua dissoluta mulier, quae non beatificat virum suum.

³³A muliere initium factum est peccati, et per illam omnes morimur.

³⁴Non des aquae tuae exitum, nec modicum, nec mulieri nequam veniam prodeundi.

³⁵Si non ambulaverit ad manum tuam, confundet te in conspectu inimicorum;

³⁶a carnibus tuis abscinde illam et dimitte illam de domo tua.