Read Nova_Vulgata DC Sirach 29 Bible Online

Sirach 29 - Nova_Vulgata DC bible

Sirach 29

¹Qui facit misericordiam, feneratur proximo suo; et, qui confortat manu, mandata servat.

²Fenerare proximo tuo in tempore necessitatis illius et iterum redde proximo in tempore suo.

³Confirma verbum et fideliter age cum illo, et omni tempore invenies, quod tibi necessarium est.

⁴Multi quasi inventionem aestimaverunt fenus et praestiterunt molestiam his, qui se adiuverunt.

⁵Donec accipiat, osculatur manus dantis et de possessionibus proximi humiliat vocem suam;

⁶et in tempore redditionis postulabit tempus, et reddet verba taedii et murmurationum et tempus causabitur.

⁷Si autem potuerit reddere, adversabitur; solidi vix reddet dimidium et computabit illud quasi inventionem.

⁸Sin autem, fraudabit illum pecunia sua et possidebit illum inimicum gratis.

⁹Et convicia et maledicta reddet illi et pro honore et beneficio reddet illi contumeliam.

¹⁰Multi non causa nequitiae non fenerati sunt, sed fraudari gratis timuerunt.

¹¹Verumtamen super humilem longanimis esto et pro eleemosyna non trahas illum.

¹²Propter mandatum assume pauperem et propter inopiam eius ne dimittas eum vacuum.

¹³Perde pecuniam propter fratrem et amicum tuum et non abscondas illam sub lapide in perditionem.

¹⁴Pone thesaurum tuum in praeceptis Altissimi, et proderit tibi magis quam aurum.

¹⁵Conclude eleemosynam in corde pauperis, et haec pro te exorabit ab omni malo.

¹⁸Super scutum roboris et super lanceam ponderis adversus inimicum tuum pugnabit pro te.

¹⁹Vir bonus fidem facit pro proximo suo; et, qui perdiderit confusionem, fugiet repromissorem.

²⁰Gratiam fideiussoris ne obliviscaris: dedit enim pro te animam suam.

²²Bona repromissoris dissipabit peccator, et ingratus sensu derelinquet liberantem se.

²⁴Repromissio multos perdidit recte agentes et commovit illos quasi fluctus maris;

²⁵viros potentes transmigrare fecit, et vagati sunt in gentibus alienis.

²⁶Peccator transgrediens mandata Domini incidet in repromissionem, et, qui conatur lucrum sectari, incidet in iudicium.

²⁷Sponde pro proximo secundum virtutem tuam, sed attende tibi, ne incidas.

²⁸Initium vitae hominis aqua et panis et vestimentum et domus protegens turpitudinem.

²⁹Melior est victus pauperis sub tegmine asserum quam epulae splendidae in peregre sine domicilio.

³⁰Super parvo et magno placeat tibi, et improperium peregrinationis non audies.

³¹Vita nequam hospitandi de domo in domum, et ubi hospitabitur, non fiducialiter aget, nec aperiet os.

³²Hospitaberis et pasceris et potaberis sine gratia, et ad haec amara audiet:

³³“ Transi, hospes, et orna mensam et, si quae in manu habes, ciba me! ”.

³⁴“ Exi a facie honoratioris! Necessitudine domus meae hospitio mihi factus est frater ”.

³⁵Gravia haec homini habenti sensum: obiurgatio peregrinationis et improperium feneratoris.