Read Nova_Vulgata DC Sirach 3 Bible Online

Sirach 3 - Nova_Vulgata DC bible

Sirach 3

¹Filii sapientiae ecclesia iustorum, et natio illorum oboedientia et dilectio.

²Indicium patris audite, filii, et sic facite, ut salvi sitis.

³Deus enim honoravit patrem in filiis et iudicium matris firmavit in filios.

⁴Qui honorat patrem, exorabit pro peccatis et continebit se ab illis et in oratione dierum exaudietur.

⁵Et, sicut qui thesaurizat, ita et qui honorificat matrem suam.

⁶Qui honorat patrem suum, iucundabitur in filiis et in die orationis suae exaudietur;

⁷qui honorat patrem suum, vita vivet longiore, et, qui oboedit patri, refrigerabit matrem.

⁸Qui timet Dominum, honorat parentes et quasi dominis serviet his, qui se genuerunt.

⁹In opere et sermone honora patrem tuum,

¹⁰ut superveniat tibi benedictio ab eo.

¹¹Benedictio patris firmat domos filiorum; maledictio autem matris eradicat fundamenta.

¹²Ne glorieris in contumelia patris tui, non est enim tibi gloria eius confusio;

¹³gloria enim hominis ex honore patris sui, et dedecus filii mater sine honore.

¹⁴Fili, suscipe senectam patris tui et non contristes eum in vita illius;

¹⁵et, si defecerit sensu, veniam da et ne spernas eum omnibus diebus vitae eius. Eleemosyna enim patris non erit in oblivione,

¹⁶nam pro peccatis ipsa plantabitur

¹⁷et in iustitia aedificabitur tibi; et in die tribulationis commemorabitur tui, et sicut in sereno glacies solventur tua peccata.

¹⁸Quam malae famae est, qui derelinquit patrem; et maledictus a Deo, qui exasperat matrem.

¹⁹Fili, in mansuetudine opera tua perfice et super hominem datorem diligeris.

²⁰Quanto magnus es, humilia te in omnibus et coram Deo invenies gratiam. Multi sunt excelsi et gloriosi, sed mansuetis revelat mysteria sua.

²¹Quoniam magna potentia Dei solius, et ab humilibus honoratur.

²²Altiora te ne quaesieris et fortiora te ne scrutatus fueris; sed, quae praecepit tibi Deus, illa cogita semper et in pluribus operibus eius ne fueris curiosus.

²³Non est enim tibi necessarium ea, quae abscondita sunt, videre oculis tuis.

²⁴In supervacuis rebus noli scrutari multipliciter;

²⁵plurima enim super sensum hominum ostensa sunt tibi.

²⁶Multos quoque supplantavit suspicio illorum, et species vana decepit sensus illorum. Sine pupilla deerit lux, sine scientia deerit sapientia.

²⁷Cor durum male habebit in novissimo; et, qui amat periculum, in illo peribit.

²⁸Cor ingrediens duas vias non habebit successus, et pravus corde in illis scandalizabitur.

²⁹Cor nequam gravabitur doloribus, et peccator adiciet peccatum ad peccatum.

³⁰Plagis superborum non erit sanitas, frutex enim peccati radicabitur in illis et non intellegetur.

³¹Cor sapientis intelleget verba sapientium, et auris audiens concupiscet sapientiam.

³²Sapiens cor et intellegibile abstinebit se a peccatis et in operibus iustitiae successus habebit.

³³Ignem ardentem exstinguit aqua, sic eleemosyna expiat peccata.

³⁴Deus prospector est eius, qui reddit gratiam; meminit eius in posterum, et in tempore casus sui inveniet firmamentum.