Read Nova_Vulgata DC Sirach 30 Bible Online

Sirach 30 - Nova_Vulgata DC bible

Sirach 30

¹De filiis. Qui diligit filium suum, assi duat illi flagella, ut laetetur in novissimo suo.

²Qui docet filium suum, fructum habebit in illo et in medio domesticorum in illo gloriabitur.

³Qui docet filium suum, in zelum mittet inimicum et in medio amicorum gloriabitur in illo.

⁴Mortuus est pater eius et quasi non est mortuus: similem enim reliquit sibi post se.

⁵In vita sua vidit et laetatus est in illo, in obitu suo non est contristatus. Nec confusus est coram inimicis:

⁶reliquit enim defensorem domus contra inimicos et amicis reddentem gratiam.

⁷Qui blanditur filio, colligabit vulnera eius, et super omnem vocem turbabuntur viscera sua.

⁸Equus indomitus evadit durus, et filius remissus evadet praeceps.

⁹Lacta filium, et paventem te faciet; lude cum eo, et contristabit te.

¹⁰Non corrideas illi, ne doleas, et in novissimo obstupescent dentes tui.

¹¹Non des illi potestatem in iuventute et ne despicias errata illius.

¹²Curva cervicem eius in iuventute et tunde latera eius, dum infans est, ne forte induret et non credat tibi, et erit tibi ab illo dolor animae.

¹³Doce filium tuum et operare in illo, ne in turpitudinem illius offendas.

¹⁴Melior est pauper sanus et fortis viribus quam dives imbecillis et flagellatus in carne sua.

¹⁵Salus carnis melior est omni auro et argento, et spiritus validus quam census immensus.

¹⁶Non est census super censum salutis corporis, et non est oblectatio super cordis gaudium.

¹⁷Melior est mors quam vita amara, et requies aeterna quam languor perseverans.

¹⁸Bona effusa in ore clauso quasi appositiones epularum circumpositae sepulcro.

¹⁹Quid proderit libatio idolo? Nec enim manducabit nec odorabitur:

²⁰sic qui effugatur a Domino portans mercedes iniquitatis,

²¹videns oculis et ingemiscens sicut spado complectens virginem et suspirans.

²²Tristitiam non des animae tuae et non affligas temetipsum in consilio tuo.

²³Iucunditas cordis haec est vita hominis et thesaurus sine defectione sanctitatis, et exsultatio viri est longaevitas.

²⁴Indulge animae tuae et consolare cor tuum et tristitiam longe repelle a te.

²⁵Multos enim occidit tristitia, et non est utilitas in illa;

²⁶zelus et iracundia minuunt dies, et ante tempus senectam adducet cogitatus.

²⁷Splendidum cor et bonum in epulis est; epulae enim illius diligenter fiunt.