Read Nova_Vulgata DC Sirach 32 Bible Online

Sirach 32 - Nova_Vulgata DC bible

Sirach 32

¹Rectorem te posuerunt? Noli extolli: esto in illis quasi unus ex ipsis.

²Curam illorum habe et sic conside et omni cura tua explicita recumbe,

³ut laeteris propter illos et decentiae gratia accipias coronam et dignationem consequaris corrogationis.

⁴Loquere, maior natu: decet enim te

⁵primum verbum in diligenti scientia; et non impedias musicam.

⁶Ubi convivium, non effundas sermonem et importune noli extolli in sapientia tua.

⁷Gemmula carbunculi in ornamento auri, et concentus musicorum in convivio vini;

⁸sicut in fabricatione aurea signum est smaragdi, sic numerus musicorum in iucundo et moderato vino.

⁹Audi tacens, et pro reverentia accedet tibi bona gratia.

¹⁰Adulescens, loquere in tua causa vix;

¹¹bis, si interrogatus fueris.

¹²Recapitula sermonem, in paucis multa; esto quasi scius et simul tacens.

¹³In medio magnatorum non praesumas et, ubi sunt senes, non multum loquaris.

¹⁴Ante tonitruum praeibit coruscatio, et ante verecundum praeibit gratia.

¹⁵Et hora surgendi non te trices; praecurre autem prior in domum tuam et illic avocare et illic lude

¹⁶et age conceptiones tuas et noli peccare in verbo superbo.

¹⁷Et super his omnibus benedicito Dominum, qui fecit te et inebriantem te ab omnibus bonis suis.

¹⁸Qui timet Dominum, excipiet doctrinam; et, qui vigilaverint ad illum, invenient benedictionem.

¹⁹Qui quaerit legem, replebitur ab ea; et, qui insidiose agit, scandalizabitur in ea.

²⁰Qui timent Dominum, invenient iudicium iustum et iustitias quasi lumen accendent.

²¹Peccator homo vitabit correptionem et secundum voluntatem suam inveniet comparationem.

²²Vir consilii non despiciet intellegentiam; alienus et superbus non pertimescet timorem.

²⁴Fili, sine consilio nihil facias et post factum non paenitebis.

²⁵In via ruinae non eas et non offendes bis in lapides; ne credas te viae inexploratae, ne ponas animae tuae scandalum.

²⁶Et a filiis tuis cave et a domesticis tuis attende.

²⁷In omni opere tuo confide animae tuae: haec est enim conservatio mandatorum.

²⁸Qui credit legi, attendit mandatis; et, qui confidit in Domino, non minorabitur.