Read Nova_Vulgata DC Sirach 36 Bible Online

Sirach 36 - Nova_Vulgata DC bible

Sirach 36

¹Miserere nostri, Deus omnium, et respice nos et ostende nobis lucem miserationum tuarum;

²et immitte timorem tuum super gentes, quae non exquisierunt te, ut cognoscant quia non est Deus nisi tu, et enarrent magnalia tua.

³Alleva manum tuam super gentes alienas, ut videant potentiam tuam.

⁴Sicut enim in conspectu eorum sanctificatus es in nobis, sic in conspectu nostro magnificaberis in eis,

⁵ut cognoscant, sicut et nos cognovimus, quoniam non est Deus praeter te, Domine.

⁶Innova signa et itera mirabilia,

⁷glorifica manum et firma brachium dextrum,

⁸excita furorem et effunde iram,

⁹tolle adversarium et afflige inimicum.

¹⁰Festina tempus et memento praefinitionis, et enarrentur mirabilia tua.

¹¹In ira flammae devoretur, qui salvatur; et, qui pessimant plebem tuam, inveniant perditionem.

¹²Contere caput principum inimicorum dicentium: “ Non est alius praeter nos!”.

¹³Congrega omnes tribus Iacob et hereditabis eos sicut ab initio.

¹⁴Miserere plebi tuae, super quam invocatum est nomen tuum, et Israel, quem coaequasti primogenito tuo.

¹⁵Miserere civitati sanctificationis tuae, Ierusalem, loco requiei tuae.

¹⁶Reple Sion maiestate tua et gloria tua templum tuum.

¹⁷Da testimonium his, qui ab initio creaturae tuae sunt, et suscita praedicationes, quas locuti sunt in nomine tuo.

¹⁸Da mercedem sustinentibus te, ut prophetae tui fideles inveniantur. Et exaudi orationes servorum tuorum,

¹⁹secundum beneplacitum super populo tuo, et dirige nos in viam iustitiae, et sciant omnes, qui habitant terram, quia tu es Deus saeculorum.

²⁰Omnem escam manducabit venter, et est cibus cibo melior;

²¹fauces percipiunt cibum ferae, et cor sensatum verba mendacia.

²²Cor pravum dabit tristitiam, et homo peritus retribuet illi.

²³Omnem masculum excipiet mulier, est autem filia melior filia.

²⁴Species mulieris exhilarat faciem viri sui, et super omnem concupiscentiam hominis superducit desiderium.

²⁵Insuper, si est super lingua eius curatio et mitigatio et misericordia, non est vir illius secundum filios hominum.

²⁶Qui possidet mulierem bonam, inchoat possessionem, adiutorium secundum illum est et columna requiei.

²⁷Ubi non est saepes, diripietur vinea, et ubi non est mulier, ingemiscet errans.

²⁸Quis credit ei, qui non habet nidum et deflectens ubicumque obscuraverit, quasi succinctus latro exsiliens de civitate in civitatem?