Read Nova_Vulgata DC Sirach 45 Bible Online

Sirach 45 - Nova_Vulgata DC bible

Sirach 45

¹dilectum a Deo et hominibus Moysen, cuius memoria in benedictione est.

²Similem illum fecit in gloria sanctorum et magnificavit eum in timore inimicorum et in verbis suis signa acceleravit.

³Glorificavit illum in conspectu regum et ius dedit illi ad populum suum et ostendit illi gloriam suam.

⁴In fide et lenitate ipsius sanctum fecit illum et elegit eum ex omni carne.

⁵Auditam fecit illi vocem suam et induxit illum in nubem;

⁶et dedit illi coram praecepta et legem vitae et disciplinae, docere Iacob testamentum suum et iudicia sua Israel.

⁷Excelsum fecit Aaron sanctum similem ei, fratrem eius de tribu Levi.

⁸Statuit illum in testamentum aeternum et dedit illi sacerdotium gentis, et beatificavit illum in gloria

⁹et circumcinxit eum zona gloriae. Et induit eum perfecto decore et coronavit eum in vasis virtutis:

¹⁰femoralia et tunicam et umerale posuit ei et cinxit illum tintinnabulis aureis, malis granatis plurimis in gyro,

¹¹ut daret sonitum in incessu suo, auditum faceret sonitum in templo in memoriam filiis gentis suae.

¹²Stola sancta auro et hyacintho et purpura, opus textile rationale iudicii et cingulum,

¹³tortum coccum opere artificis, gemmae pretiosae super rationale in ligatura auri, opere lapidarii sculptis, in memoriam cum scriptura sculpta secundum numerum tribuum Israel.

¹⁴Corona aurea super mitram eius, lamina cum signo sanctitatis, gloria honoris, opus virtutis et desideria oculorum, perfecta pulchritudo.

¹⁵Sic pulchra ante ipsum non fuerunt talia in sempiternum;

¹⁶non induet illa alienigena aliquis, sed tantum filii ipsius soli et nepotes eius per omne tempus.

¹⁷Sacrificium ipsius consumitur igne cotidie iuge bis.

¹⁸Complevit Moyses manus eius et unxit illum oleo sancto.

¹⁹Factum est illi in testamentum aeternum et semini eius sicut dies caeli: ministrare illi et fungi sacerdotio et benedicere populum suum in nomine eius.

²⁰Ipsum elegit ab omni vivente offerre sacrificium Deo, incensum et adipes et incendere bonum odorem et memoriale et placare pro populo suo.

²¹Et dedit illi in praeceptis suis potestatem, in testamentis iudiciorum: docere Iacob testimonia et in lege sua lucem dare Israel.

²²Quia contra illum steterunt alieni, et propter invidiam circumdederunt illum homines in deserto, qui erant cum Dathan et Abiram, et congregatio Core in iracundia furoris sui.

²³Vidit Dominus Deus, et non placuit illi, et consumpti sunt in impetu iracundiae eius.

²⁴Fecit illis monstra et consumpsit illos in flamma ignis.

²⁵Et addidit Aaron gloriam et dedit illi hereditatem et primitias frugum terrae divisit illi.

²⁶Panem ipsis in primis paravit in satietatem, nam et sacrificia Domini edent, quae dedit illi et semini eius.

²⁷Ceterum in terra gentis non hereditabit, et pars non est illi in gente: ipse est enim pars eius et hereditas.

²⁸Et Phinees filius Eleazari tertius in gloria est, zelando timorem Domini;

²⁹et stetit in ruptura pro gente, in bonitate et alacritate animae suae placuit Deo pro lsrael.

³⁰Ideo statuit illi testamentum pacis, principem sanctorum et gentis suae, ut sit illi et semini eius sacerdotii dignitas in aeternum.

³¹Et testamentum David regi filio Iesse de tribu Iudae, hereditas viri coram gloria eius, hereditas Aaron et semini eius. Det vobis sapientiam in cor vestrum iudicare gentem suam in iustitia, ne abolerentur bona ipsorum, et gloria ipsorum in generationes aeternas.