Read Nova_Vulgata DC Sirach 49 Bible Online

Sirach 49 - Nova_Vulgata DC bible

Sirach 49

¹Memoria Iosiae in compositionem odoris facta opere pigmentarii;

²in omni ore quasi mel indulcabitur eius memoria et ut musica in convivio vini.

³Ipse est directus divinitus in paenitentia gentis et tulit abominationes impietatis;

⁴et gubernavit ad Dominum cor suum et in diebus peccatorum corroboravit pietatem.

⁵Praeter David et Ezechiam et Iosiam, omnes peccatum commiserunt;

⁶nam reliquerunt legem Altissimi reges Iudae et contempserunt timorem Dei;

⁷dederunt enim regnum suum aliis et gloriam suam alienae genti;

⁸incenderunt electam sanctuarii civitatem et desertas fecerunt vias ipsius in manu Ieremiae.

⁹Nam male tractaverunt illum, ipse autem a ventre matris consecratus est propheta evertere et eruere et perdere et iterum aedificare et plantare et renovare.

¹⁰Ezechiel, qui vidit visionem gloriae, quam ostendit illi in curru cherubim.

¹¹Nam et commemoratus est inimicorum in imbre et benefacere illis, qui ostenderunt rectas vias.

¹²Et duodecim prophetarum ossa pullulent de loco suo; nam corroboraverunt Iacob et redemerunt eos in fide virtutis.

¹³Quomodo amplificemus Zorobabel? Nam et ipse quasi signum in dextera manu;

¹⁴sic et Iesua filius Iosedec. Qui in diebus suis aedificaverunt domum et exaltaverunt templum sanctum Domino paratum in gloriam sempiternam.

¹⁵Et Nehemias: in memoria multi temporis, qui erexit nobis muros eversos et stare fecit portas et seras; qui erexit domos nostras.

¹⁶Nemo creatus est in terra qualis Henoch; nam et ipse assumptus est a terra.

¹⁷Neque ut Ioseph natus est homo, princeps fratrum, firmamentum gentis;

¹⁸et ossa ipsius visitata sunt et post mortem prophetaverunt.

¹⁹Seth et Sem apud homines gloriam adepti sunt et super omnem animam in origine Adam.