Read Nova_Vulgata DC Sirach 6 Bible Online

Sirach 6 - Nova_Vulgata DC bible

Sirach 6

¹Nec pusillum nec multum noceas et noli fieri pro amico inimicus. Nomen enim malum et improperium et contumeliam hereditabis; sic omnis peccator invidus et bilinguis.

²Non te extollas in cogitatione animae tuae velut taurus, ne forte elidatur virtus tua per stultitiam,

³et folia tua comedat et fructus tuos perdat, et relinquaris velut lignum aridum in eremo.

⁴Anima enim nequam disperdet eum, qui se habet, et in gaudium inimicis dat illum et deducet in sortem impiorum.

⁵Os dulce multiplicat amicos et mitigat inimicos; et lingua eucharis salutem dicit.

⁶Multi pacifici sint tibi, et consiliarius sit tibi unus de mille.

⁷Si possides amicum, in tentatione posside eum et ne facile credas ei.

⁸Est enim amicus secundum opportunitatem suam et non permanebit in die tribulationis.

⁹Et est amicus, qui convertitur ad inimicitiam et rixam convicii tui denudabit.

¹⁰Est autem amicus socius mensae et non permanebit in die necessitatis;

¹¹in prosperis erit tibi quasi coaequalis et in domesticis tuis fiducialiter aget.

¹²Si humiliatus fueris, convertetur contra te et a facie tua abscondet se.

¹³Ab inimicis tuis separare et de amicis tuis attende.

¹⁴Amicus fidelis protectio fortis; qui autem invenit illum, invenit thesaurum.

¹⁵Amico fideli nulla est comparatio, et non est ponderatio contra bonitatem illius.

¹⁶Amicus fidelis medicamentum vitae, et, qui metuunt Dominum, invenient illum.

¹⁷Qui timet Deum, aeque habebit amicitiam eius, quoniam secundum illum erit amicus illius.

¹⁸Fili, a iuventute tua excipe doctrinam et usque ad canos invenies sapientiam.

¹⁹Quasi is qui arat et seminat, accede ad eam et sustine bonos fructus illius.

²⁰In opere enim ipsius exiguum laborabis et cito edes de generationibus illius.

²¹Quam aspera est nimium sapientia indoctis hominibus, et non permanebit in illa excors.

²²Quasi lapis probationis gravis erit super illum, et non demorabitur proicere illam.

²³Doctrina est enim secundum nomen eius et non est multis manifesta; quibus autem cognita est, permanet usque ad conspectum Dei.

²⁴Audi, fili, et accipe sententiam meam et ne abicias consilium meum.

²⁵Inice pedem tuum in compedes illius et in torques illius collum tuum;

²⁶subice umerum tuum et porta illam et ne acedieris vinculis eius.

²⁷In omni animo tuo accede ad illam et in omni virtute tua conserva vias eius.

²⁸Investiga et scrutare, exquire et invenies, et continens factus ne derelinquas eam.

²⁹In novissimis enim invenies requiem in ea, et convertetur tibi in oblectationem.

³⁰Et erunt tibi compedes eius in protectionem fortitudinis, et torques illius in stolam gloriae;

³¹decor enim aureus est in illa, et vincula illius alligatura hyacinthina.

³²Stolam gloriae indues eam et coronam gratulationis superpones tibi.

³³Fili, si attenderis, disces; et, si accommodaveris animum tuum, prudens eris.

³⁴Si dilexeris audire, excipies doctrinam; et, si inclinaveris aurem tuam, sapiens eris.

³⁵In multitudine presbyterorum sta et sapientiae illorum ex corde coniungere, ut omnem narrationem Dei velis audire, et proverbia intellectus non effugiant a te.

³⁶Et, si videris sensatum, evigila ad eum, et gradus ostiorum illius exterat pes tuus.

³⁷Cogitatum tuum habe in praeceptis Dei et in mandatis illius maxime assiduus esto; et ipse firmabit tibi cor, et concupiscentia sapientiae dabitur tibi.