Read Nova_Vulgata DC Sirach 9 Bible Online

Sirach 9 - Nova_Vulgata DC bible

Sirach 9

¹Non zeles mulierem sinus tui, ne doceas contra te notitiam ne quam.

²Non des mulieri potestatem animae tuae, ne ingrediatur in virtutem tuam, et confundaris.

³Ne adeas ad mulierem multivolam, ne forte incidas in laqueos illius.

⁴Cum psaltria ne assiduus sis nec audias illam, ne forte pereas in efficacitate illius.

⁵Virginem ne conspicias, ne forte scandalizeris in decore illius.

⁶Ne des fornicariis animam tuam in ullo, ne perdas te et hereditatem tuam.

⁷Noli circumspicere in vicis civitatis, nec oberraveris in plateis illius.

⁸Averte faciem tuam a muliere compta et ne circumspicias speciem alienam.

⁹Propter speciem mulieris multi perierunt, et ex hoc concupiscentia quasi ignis exardescit.

¹²Cum alterius muliere ne sedeas omnino nec accumbas cum ea super cubitum in vino,

¹³ne forte declinet cor tuum in illam, et sanguine tuo labaris in perditionem.

¹⁴Ne derelinquas amicum antiquum: novus enim non erit similis illi.

¹⁵Vinum novum amicus novus: veterascet, et cum suavitate bibes illud.

¹⁶Non zeles gloriam et opes peccatoris; non enim scis quae futura sit illius subversio.

¹⁷Non placeat tibi prosperitas iniustorum sciens quoniam usque ad inferos non iustificabuntur.

¹⁸Longe abesto ab homine potestatem habente occidendi et non suspicaberis timorem mortis;

¹⁹et, si accesseris ad illum, noli aliquid committere, ne forte auferat vitam tuam.

²⁰Communionem mortis scito, quoniam in medio laqueorum ingredieris et super retia ambulabis.

²¹Secundum virtutem tuam conversare cum proximo tuo et cum sapientibus et prudentibus tracta.

²²Et cum sensato sit cogitatus tuus, et omnis enarratio tua in praeceptis Altissimi.

²³Viri iusti sint tibi convivae, et in timore Dei sit tibi gloriatio.

²⁴In manu artificum opera laudabuntur, et princeps populi in sapientia sermonis sui, in sensu vero seniorum verbum.

²⁵Terribilis est in civitate sua homo linguosus, et temerarius in verbo suo odibilis erit.