Read Nova_Vulgata DC Leviticus 14 Bible Online

Leviticus 14 - Nova_Vulgata DC bible

Leviticus 14

¹Locutusque est Dominus ad Moysen dicens:

²" Hic est ri tus leprosi, quando mundandus est: adducetur ad sacerdotem,

³qui egressus e castris, cum invenerit lepram esse sanatam,

⁴praecipiet, ut sumant pro eo, qui purificatur, duas aves vivas, mundas et lignum cedrinum vermiculumque et hyssopum.

⁵Et unam ex avibus immolari iubebit in vase fictili super aquas viventes.

⁶Aliam autem vivam cum ligno cedrino et cocco et hyssopo tinguet in sanguine avis super aquas viventes immolatae,

⁷quo asperget illum, qui a lepra mundandus est, septies, ut iure purgetur; et dimittet avem vivam, ut in agrum avolet.

⁸Cumque laverit homo vestimenta sua, radet omnes pilos corporis, et lavabitur aqua; purificatusque ingredietur castra, ita dumtaxat ut maneat extra tabernaculum suum septem diebus.

⁹Et die septimo radet capillos capitis barbamque et supercilia ac totius corporis pilos et lavabit vestimenta carnemque suam aqua, et mundus erit.

¹⁰Die octavo assumet duos agnos immaculatos et ovem anniculam absque macula et tres decimas ephi similae in sacrificium, quae conspersa sit oleo, et log olei.

¹¹Cumque sacerdos purificans hominem statuerit eum et haec omnia coram Domino in ostio tabernaculi conventus,

¹²tollet agnum unum et offeret eum in sacrificium pro delicto, oleique log et, elevatis ante Dominum omnibus,

¹³immolabit agnum, ubi immolari solet hostia pro peccato et holocaustum, id est in loco sancto. Sicut enim pro peccato ita et pro delicto ad sacerdotem pertinet sacrificium: sanctum sanctorum est.

¹⁴Assumensque sacerdos de sanguine hostiae pro delicto ponet super extremum auriculae dextrae eius, qui mundatur, et super pollices manus dextrae et pedis;

¹⁵et de olei log mittet in manum suam sinistram

¹⁶tinguetque digitum dextrum in eo et asperget septies coram Domino.

¹⁷Quod autem reliquum est olei in laeva manu, fundet super extremum auriculae dextrae eius, qui mundatur, et super pollices manus ac pedis dextri et super sanguinem sacrificii pro delicto

¹⁸et super caput eius, qui mundatur; expiabitque eum coram Domino

¹⁹et faciet sacrificium pro peccato. Tunc immolabit holocaustum

²⁰et ponet illud in altari cum sacrificio similae, et homo rite mundabitur.

²¹Quod si pauper est, et non potest manus eius invenire, quae dicta sunt, assumet agnum pro delicto ad elationem, ut expiet eum sacerdos, decimamque partem similae conspersae oleo in sacrificium et olei log

²²duosque turtures sive duos pullos columbae, quos manus eius invenire poterit, unum pro peccato et alterum in holocaustum.

²³Offeretque ea die octavo purificationis suae sacerdoti ad ostium tabernaculi conventus coram Domino.

²⁴Qui suscipiens agnum pro delicto et log olei levabit simul coram Domino;

²⁵immolatoque agno pro delicto, de sanguine eius ponet super extremum auriculae dextrae illius, qui mundatur, et super pollices manus eius ac pedis dextri;

²⁶olei vero partem mittet in manum suam sinistram.

²⁷In quo tinguens digitum dextrae manus asperget septies coram Domino;

²⁸tangetque extremum auriculae dextrae illius, qui mundatur, et pollices manus ac pedis dextri super locum sanguinis, qui effusus est pro delicto.

²⁹Reliquam autem partem olei, quae est in sinistra manu, mittet super caput hominis, qui purificatur, in expiationem eius coram Domino;

³⁰et turtures sive pullos columbae, quos manus illius invenerit, offeret,

³¹unum pro delicto et alterum in holocaustum cum sacrificio similae, et sic expiabit eum sacerdos coram Domino.

³²Hoc est sacrificium leprosi, qui habere non potest omnia in emundationem sui".

³³Locutus est Dominus ad Moysen et Aaron dicens:

³⁴" Cum ingressi fueritis terram Chanaan, quam ego dabo vobis in possessionem, si fuerit plaga leprae in aedibus terrae possessionis vestrae,

³⁵ibit, cuius est domus, nuntians sacerdoti et dicet: "Quasi plaga videtur mihi esse in domo mea".

³⁶At ille praecipiet, ut efferant universa de domo, priusquam ingrediatur eam, et videat plagam, ne immunda fiant omnia, quae in domo sunt. Intrabitque postea, ut consideret domum;

³⁷et, cum viderit in parietibus illius quasi valliculas pallore sive rubore deformes et humiliores superficie reliqua,

³⁸egredietur ostium domus et statim claudet eam septem diebus.

³⁹Reversusque die septimo considerabit eam; si invenerit crevisse plagam,

⁴⁰iubebit erui lapides, in quibus plaga est, et proici eos extra civitatem in loco immundo;

⁴¹domum autem ipsam radi intrinsecus per circuitum et spargi pulverem rasurae extra urbem in locum immundum

⁴²lapidesque alios reponi pro his, qui ablati fuerint, et luto alio liniri domum.

⁴³Sin autem plaga rursum effloruerit in domo, postquam eruti sunt lapides et pulvis erasus et alia terra lita,

⁴⁴et ingressus sacerdos viderit crevisse plagam in domo: lepra est maligna et domus immunda.

⁴⁵Quam statim destruent et lapides eius ac ligna atque universum pulverem domus proicient extra oppidum in loco immundo.

⁴⁶Qui intraverit domum, quando clausa est, immundus erit usque ad vesperum;

⁴⁷et, qui dormierit in ea vel comederit quippiam, lavabit vestimenta sua.

⁴⁸Quod si introiens sacerdos viderit plagam non crevisse in domo, postquam denuo lita est, mundam eam esse decernet, reddita sanitate.

⁴⁹Et in purificationem eius sumet duas aves lignumque cedrinum et vermiculum atque hyssopum

⁵⁰et, immolata una avi in vase fictili super aquas vivas,

⁵¹tollet lignum cedrinum et hyssopum et coccum et avem vivam et intinguet omnia in sanguine avis immolatae atque in aquis viventibus et asperget domum septies;

⁵²purificabitque eam tam in sanguine avis quam in aquis viventibus et in avi viva lignoque cedrino et hyssopo atque vermiculo;

⁵³cumque dimiserit avem avolare extra urbem in agrum libere, expiabit domum, et erit munda.

⁵⁴Ista est lex omnis leprae et scabiei,

⁵⁵leprae vestium et domorum,

⁵⁶tumoris et pustulae et lucentis maculae,

⁵⁷ut possit sciri quo tempore immundum quid vel mundum sit".