Read Nova_Vulgata DC Leviticus 19 Bible Online

Leviticus 19 - Nova_Vulgata DC bible

Leviticus 19

¹Locutus est Dominus ad Moysen dicens:

²" Loquere ad omnem coetum filiorum Israel et dices ad eos: Sancti estote, quia sanctus sum ego, Dominus Deus vester.

³Unusquisque matrem et patrem suum timeat. Sabbata mea custodite. Ego Dominus Deus vester.

⁴Nolite converti ad idola nec deos conflatiles faciatis vobis. Ego Dominus Deus vester.

⁵Si immolaveritis hostiam pacificorum Domino, immolabitis eam ita ut sit vobis placabilis.

⁶Eo die, quo fuerit immolata, comedetur et die altero; quidquid autem residuum fuerit in diem tertium, igne comburetur.

⁷Si quid post biduum comestum fuerit, profanum erit neque acceptabile.

⁸Qui manducaverit illud, portabit iniquitatem suam, quia sanctum Domini polluit, et peribit anima illa de populo suo.

⁹Cum messueris segetes terrae tuae, non tondebis usque ad marginem agri tui nec remanentes spicas colliges.

¹⁰Neque in vinea tua racemos et grana decidentia congregabis, sed pauperibus et peregrinis carpenda dimittes. Ego Dominus Deus vester.

¹¹Non facietis furtum. Non mentiemini, nec decipiet unusquisque proximum suum.

¹²Non periurabis in nomine meo nec pollues nomen Dei tui. Ego Dominus.

¹³Non facies calumniam proximo tuo nec spoliabis eum. Non morabitur merces mercennarii apud te usque mane.

¹⁴Non maledices surdo nec coram caeco pones offendiculum; sed timebis Deum tuum. Ego Dominus.

¹⁵Non facietis, quod iniquum est in iudicio. Non consideres personam pauperis nec honores vultum potentis. Iuste iudica proximo tuo.

¹⁶Non eris criminator et susurro in populo tuo. Non stabis contra sanguinem proximi tui. Ego Dominus.

¹⁷Ne oderis fratrem tuum in corde tuo; argue eum, ne habeas super illo peccatum.

¹⁸Non quaeres ultionem nec irasceris civibus tuis. Diliges proximum tuum sicut teipsum. Ego Dominus.

¹⁹Leges meas custodite.Iumenta tua non facies coire cum alterius generis animantibus. Agrum tuum non seres diverso semine. Veste, quae ex duobus texta est, non indueris.

²⁰Homo, si dormierit cum muliere coitu seminis, quae sit ancilla destinata viro et tamen pretio non redempta nec libertate donata, vapulabunt ambo et non morientur, quia non fuit libera.

²¹Et in sacrificium suum pro delicto offeret Domino ad ostium tabernaculi conventus arietem;

²²expiabitque eum sacerdos ariete a peccato eius coram Domino, et dimittetur ei peccatum, quod peccavit.

²³Quando ingressi fueritis terram et plantaveritis omnimoda ligna pomifera, non auferetis praeputia eorum, id est poma, quae germinant; tribus annis erunt vobis immunda ut praeputia, nec edetis ex eis.

²⁴Quarto anno omnis fructus eorum sanctificabitur laudabilis Domino.

²⁵Quinto autem anno comedetis fructus eorum, ut augeatur vobis proventus eorum. Ego Dominus Deus vester.

²⁶Non comedetis cum sanguine.Non augurabimini nec observabitis omina.

²⁷Neque in rotundum attondebitis marginem comae nec truncabis barbam.

²⁸Et super mortuo non incidetis carnem vestram neque figuras aliquas in cute incidetis vobis. Ego Dominus.

²⁹Ne polluas et prostituas filiam tuam, ne contaminetur terra et impleatur piaculo.

³⁰Sabbata mea custodite et sanctuarium meum metuite. Ego Dominus.

³¹Non declinetis ad pythones nec ab hariolis aliquid sciscitemini, ut polluamini per eos. Ego Dominus Deus vester.

³²Coram cano capite consurge et honora personam senis; et time Deum tuum. Ego Dominus.

³³Si habitaverit tecum advena in terra vestra, non opprimetis eum;

³⁴sed sit inter vos quasi indigena, et diliges eum sicut teipsum: fuistis enim et vos advenae in terra Aegypti. Ego Dominus Deus vester.

³⁵Nolite facere iniquum aliquid in iudicio, in regula, in pondere, in mensura.

³⁶Statera iusta, aequa pondera, iustum ephi aequumque hin sint vobis. Ego Dominus Deus vester, qui eduxi vos de terra Aegypti.

³⁷Custodite omnia praecepta mea et universa iudicia et facite ea. Ego Dominus".