Read Nova_Vulgata DC Leviticus 24 Bible Online

Leviticus 24 - Nova_Vulgata DC bible

Leviticus 24

¹Et locutus est Dominus ad Moysen dicens:

²" Praecipe fi liis Israel, ut afferant tibi oleum de olivis purissimum ac lucidum ad concinnandas lucernas candelabri iugiter.

³Extra velum testimonii in tabernaculo conventus parabit illud Aaron a vespere usque ad mane coram Domino iugiter, ritu perpetuo in generationibus vestris.

⁴Super candelabro mundissimo parabit lucernas semper in conspectu Domini.

⁵Accipies quoque similam et coques ex ea duodecim panes, qui singuli habebunt duas decimas,

⁶quorum senos altrinsecus super mensam purissimam coram Domino statues.

⁷Et pones super ambas strues tus lucidissimum, ut sit panis in memoriale, incensum Domino.

⁸Per singula sabbata mutabuntur coram Domino suscepti a filiis Israel; foedus sempiternum.

⁹Eruntque Aaron et filiorum eius, ut comedant eos in loco sancto, quia sanctum sanctorum est ei de incensis Domini; iure perpetuo".

¹⁰Ecce autem egressus filius mulieris Israelitis, quem pepererat de viro Aegyptio inter filios Israel, iurgatus est in castris cum viro Israelita.

¹¹Cumque blasphemasset nomen et maledixisset ei, adductus est ad Moysen; vocabatur autem mater eius Salomith filia Dabri de tribu Dan.

¹²Miseruntque eum in custodiam, donec nossent quid iuberet Dominus.

¹³Qui locutus est ad Moysen dicens:

¹⁴" Educ blasphemum extra castra, et ponant omnes, qui audierunt, manus suas super caput eius, et lapidet eum coetus universus.

¹⁵Et ad filios Israel loqueris:Homo, qui maledixerit Deo suo, portabit peccatum suum;

¹⁶et, qui blasphemaverit nomen Domini, morte moriatur: lapidibus opprimet eum omnis coetus, sive ille peregrinus sive civis fuerit. Qui blasphemaverit nomen Domini, morte moriatur.

¹⁷Qui percusserit et occiderit hominem, morte moriatur.

¹⁸Qui percusserit animal, reddet vicarium, id est animam pro anima.

¹⁹Qui irrogaverit maculam cuilibet civium suorum, sicut fecit, sic fiet ei:

²⁰fracturam pro fractura, oculum pro oculo, dentem pro dente restituet; qualem inflixerit maculam, talem sustinere cogetur.

²¹Qui percusserit iumentum, reddet aliud. Qui percusserit hominem, morietur.

²²Aequum iudicium sit inter vos, sive peregrinus sive civis peccaverit; quia ego sum Dominus Deus vester".

²³Locutusque est Moyses ad filios Israel, et eduxerunt eum, qui blasphemaverat, extra castra, ac lapidibus oppresserunt. Feceruntque filii Israel, sicut praeceperat Dominus Moysi.