Read Nova_Vulgata DC Ieremiae 37 Bible Online

Ieremiae 37 - Nova_Vulgata DC bible

Ieremiae 37

¹Et regnavit rex Sedecias filius Iosiae pro Iechonia filio Ioachim; quem constituit regem Nabuchodonosor rex Babylonis in terra Iudae.

²Et non oboedivit, ipse et servi eius et populus terrae, verbis Domini, quae locutus est in manu Ieremiae prophetae.

³Et misit rex Sedecias Iuchal filium Selemiae et Sophoniam filium Maasiae sacerdotem ad Ieremiam prophetam dicens: "Ora pro nobis Dominum Deum nostrum".

⁴Ieremias autem libere ambulabat in medio populi; non enim miserant eum in custodiam carceris.

⁵Igitur exercitus pharaonis egressus est de Aegypto, et audientes Chaldaei, qui obsidebant Ierusalem, huiuscemodi nuntium recesserunt ab Ierusalem.

⁶Et factum est verbum Domini ad Ieremiam prophetam dicens:

⁷" Haec dicit Dominus, Deus Israel: Sic dicetis regi Iudae, qui misit vos ad me interrogandum: Ecce exercitus pharaonis, qui egressus est vobis in auxilium, revertetur in terram suam in Aegyptum;

⁸et redient Chaldaei et bellabunt contra civitatem hanc et capient eam et succendent eam igni.

⁹Haec dicit Dominus: Nolite decipere animas vestras dicentes: "Euntes abibunt et recedent a nobis Chaldaei", quia non abibunt.

¹⁰Sed et si percusseritis omnem exercitum Chaldaeorum, qui proeliantur adversum vos, et derelicti fuerint ex eis aliqui vulnerati, singuli de tentorio suo consurgent et incendent civitatem hanc igni".

¹¹Ergo cum recessisset exercitus Chaldaeorum ab Ierusalem propter exercitum pharaonis,

¹²egressus est Ieremias de Ierusalem, ut iret in terram Beniamin et divideret ibi possessionem in conspectu populi.

¹³Cumque pervenisset ad portam Beniamin, erat ibi custos portae nomine Ierias filius Selemiae filii Hananiae; et apprehendit Ieremiam prophetam dicens: "Ad Chaldaeos profugis".

¹⁴Et respondit Ieremias: "Falsum est! Non fugio ad Chaldaeos". Et non audivit eum; sed comprehendit Ierias Ieremiam et adduxit eum ad principes.

¹⁵Et irati sunt principes contra Ieremiam, quem caesum miserunt in carcerem, qui erat in domo Ionathan scribae; eam enim in carcerem fecerant.

¹⁶Itaque ingressus est Ieremias in domum laci fornice tectam; et sedit ibi Ieremias diebus multis.

¹⁷Mittens autem Sedecias rex tulit eum et interrogavit eum in domo sua abscondite et dixit: "Putasne est sermo a Domino?". Et dixit Ieremias: "Est "; et ait: "In manus regis Babylonis traderis".

¹⁸Et dixit Ieremias ad regem Sedeciam: "Quid peccavi tibi et servis tuis et populo isti, quia misistis me in domum carceris?

¹⁹Ubi sunt prophetae vestri, qui prophetabant vobis et dicebant: "Non veniet rex Babylonis super vos et super terram hanc"?

²⁰Nunc ergo audi, obsecro, domine mi rex; valeat deprecatio mea in conspectu tuo, et ne me remittas in domum Ionathan scribae, ne moriar ibi.

²¹Praecepit ergo rex Sedecias, ut traderetur Ieremias in vestibulo custodiae, et daretur ei torta panis cotidie ex vico Pistorum, donec consumerentur omnes panes de civitate. Et mansit Ieremias in vestibulo custodiae.