Read Nova_Vulgata DC Baruch 3 Bible Online

Baruch 3 - Nova_Vulgata DC bible

Baruch 3

¹Domine omnipotens, Deus Is rael, anima in angustiis et spiri tus anxius clamat ad te.

²Audi, Domine, et miserere, quia peccavimus in conspectu tuo;

³quia tu sedens es in aeternum, et nos pereuntes in aeternum.

⁴Domine omnipotens, Deus Israel, audi nunc orationem defunctorum Israel et filiorum eorum, qui peccaverunt in conspectu tuo, qui non audierunt vocem Domini Dei sui, et adhaeserunt nobis mala.

⁵Noli memor esse iniquitatum patrum nostrorum, sed memor esto manus tuae et nominis tui in hoc tempore,

⁶quia tu es Dominus Deus noster, et laudabimus te, Domine,

⁷quia propter hoc dedisti timorem tuum in cor nostrum, ut invocaremus nomen tuum; et laudabimus te in captivitate nostra, quia avertimus a corde nostro omnem iniquitatem patrum nostrorum, qui peccaverunt in conspectu tuo.

⁸Ecce nos hodie in captivitate nostra, quo nos dispersisti in opprobrium et in maledictum et in expiationem, secundum omnes iniquitates patrum nostrorum, qui discesserunt a Domino Deo nostro ”.

⁹Audi, Israel, mandata vitae; auribus percipite, ut sciatis prudentiam.

¹⁰Quid est, Israel? Quid est quod in terra es inimicorum?

¹¹Inveterasti in terra aliena, coinquinatus es mortuis, reputatus es cum eis, qui apud inferos sunt.

¹²Dereliquisti fontem sapientiae!

¹³Si in via Dei ambulasses, habitasses in pace in aeternum.

¹⁴Disce, ubi sit prudentia, ubi fortitudo, ubi sit intellectus, ut scias simul, ubi sit longiturnitas dierum et vita, ubi sit lumen oculorum et pax.

¹⁵Quis invenit locum eius? Et quis intravit in thesauros eius?

¹⁶Ubi sunt principes gentium et qui dominantur bestiis, quae sunt super terram,

¹⁷qui in avibus caeli ludunt,

¹⁸qui argentum thesaurizant et aurum, in quo confidunt homines, neque est finis acquisitionis eorum; qui argentum fabricant et solliciti sunt, nec est inquisitio operum illorum?

¹⁹Exterminati sunt et ad inferos descenderunt, et alii loco eorum surrexerunt.

²⁰Iuvenes viderunt lumen et habitaverunt super terram; viam autem disciplinae non cognoverunt

²¹nec intellexerunt semitas eius; neque susceperunt eam filii eorum, a via eorum longe facti sunt.

²²Neque audita est in Chanaan neque visa est in Theman.

²³Filii quoque Agar, qui exquirunt sapientiam super terram, negotiatores Merran et Theman et fabulatores et inquisitores prudentiae: viam autem sapientiae non cognoverunt neque commemorati sunt semitas eius.

²⁴O Israel, quam magna est domus Dei, et ingens locus possessionis eius!

²⁵Magnus est et non habet finem, excelsus est et immensus.

²⁶Ibi fuerunt gigantes nominati illi, qui ab initio fuerunt, statura magna, scientes bellum.

²⁷Non illos elegit Deus neque viam disciplinae dedit illis;

²⁸et perierunt, quia non habuerunt prudentiam, perierunt propter insipientiam suam.

²⁹Quis ascendit in caelum et accepit eam et deduxit eam de nubibus?

³⁰Quis transfretavit mare et invenit eam et apportabit eam auro electo?

³¹Non est qui noverit viam eius, neque qui cogitet semitam eius.

³²Sed qui scit omnia, novit eam, adinvenit eam prudentia sua; qui composuit terram in aeternum tempus, implevit eam iumentis quadrupedibus;

³³qui mittit lumen et vadit, vocavit illud, et oboedivit ei in tremore.

³⁴Stellae autem splenduerunt in custodiis suis et laetatae sunt.

³⁵Vocavit eas, et dixerunt: “Adsumus”; luxerunt cum laetitia ei, qui fecit eas.

³⁶Hic est Deus noster, non aestimabitur alter adversus eum.

³⁷Invenit omnem viam disciplinae et dedit eam Iacob puero suo et Israel dilecto suo.

³⁸Post haec super terram visa est et inter homines conversata est.