Read Nova_Vulgata DC Baruch 6 Bible Online

Baruch 6 - Nova_Vulgata DC bible

Baruch 6

¹Propter peccata, quae peccastis ante Deum, abducemini in Babyloniam captivi a Nabuchodonosor rege Babyloniorum.

²Ingressi itaque in Babylonem, eritis illic annis pluribus et tempus longum usque ad generationes septem; post hoc autem educam vos inde cum pace.

³Nunc autem videbitis in Babylone deos argenteos et aureos et ligneos in umeris portari, ostentantes metum gentibus.

⁴Cavete ergo, ne et vos assimilati assimilemini alienigenis, et metus vos capiat in ipsis.

⁵Videntes turbam ante et retro adorantem eos, dicite autem in corde vestro: “ Te oportet adorare, Domine ”.

⁶Angelus enim meus vobiscum est; ipse autem exquiret animas vestras.

⁷Nam lingua eorum polita a fabro; ipsa etiam inaurata et inargentata falsa sunt et non possunt loqui.

⁸Et sicut virgini ornatum amanti, accepto auro fabricantur

⁹coronas super capita deorum suorum. Interdum autem accidit etiam, ut sacerdotes, subtrahentes a diis aurum et argentum, erogent illud in semetipsos

¹⁰et dent ex ipso et prostitutis in lupanari. Et ornant illos ut homines vestimentis, deos argenteos et aureos et ligneos.

¹¹Hi autem non liberantur ab aerugine et tinea.

¹²Opertis illis veste purpurea, extergunt faciem eorum propter pulverem domus, qui est plurimus super eos.

¹³Et sceptrum habet ut homo, iudex regionis, qui in se peccantem non interficiet.

¹⁴Habet etiam gladium in manu dextera et securim, se autem de bello et a latronibus non liberabit. Unde notum est quia non sunt dii;

¹⁵non ergo timueritis eos. Sicut enim vas hominis confractum inutile fit, tales sunt dii eorum.

¹⁶Collocatis illis in domo, oculi eorum pleni sunt pulvere ex pedibus introeuntium.

¹⁷Et sicut alicui, qui regem offendit, circumsaeptae sunt aulae, tamquam ad mortem ducto, domus eorum muniunt sacerdotes ostiis et clausuris et seris, ne a latronibus exspolientur.

¹⁸Lucernas accendunt et quidem plures quam sibi ipsis, quarum nullam videre possunt.

¹⁹Sunt autem sicut trabes in domo; corda vero eorum dicunt elingere serpentes, qui de terra sunt; dum comedunt eos et vestimentum eorum, non sentiunt.

²⁰Nigrae fiunt facies eorum a fumo, qui in domo fit.

²¹Super corpus eorum et super caput volitant noctuae et hirundines et aves, similiter et cattae.

²²Unde scietis quia non sunt dii; non ergo timueritis eos.

²³Aurum enim, quod circa se habent ad speciem, nisi aliquis exterserit aeruginem, non fulgebit; neque enim, cum conflabantur, sentiebant.

²⁴Ex omni pretio empta sunt, in quibus spiritus non est.

²⁵Sine pedibus, in umeris portantur, ostentantes ignobilitatem suam hominibus; confunduntur et, qui excolunt ea,

²⁶propter quod, ne forte cadat in terram, per ipsos erigetur. Neque, si quis illud erectum statuerit, per semetipsum movebitur neque, si inclinatum fuerit, erigetur; sed sicut mortuis munera illis apponuntur.

²⁷Hostias vero eorum sacerdotes eorum vendunt et abutuntur; similiter et uxores eorum, ex ipsis partes sale condientes, neque mendico neque infirmo aliquid impertiunt. De sacrificiis eorum menstruatae et fetae contingunt.

²⁸Scientes itaque ex his quia non sunt dii, ne timueritis eos.

²⁹Unde enim vocabuntur dii? Quia mulieres apponunt diis argenteis et aureis et ligneis,

³⁰et in domibus illorum sacerdotes sedent habentes tunicas scissas et capita et barbam rasam, quorum capita nuda sunt.

³¹Rugiunt autem clamantes coram diis suis sicut in cena mortui.

³²A vestimento eorum auferunt sacerdotes et vestiunt uxores suas et filios suos.

³³Neque si quid mali patiantur ab aliquo neque si bonum, poterint retribuere; neque constituere regem possunt neque auferre.

³⁴Similiter neque divitias neque aes poterunt dare. Si quis illis votum voverit nec reddiderit, non requirent.

³⁵De morte hominem non liberabunt neque infirmiorem a potentiore eripient.

³⁶Hominem caecum ad visum non restituent, de necessitate hominem non liberabunt.

³⁷Viduae non miserebuntur neque orphano benefacient.

³⁸Lapidibus de monte similes sunt, lignea et inaurata et inargentata; qui autem excolunt illa, confundentur.

³⁹Quomodo ergo aestimandum aut dicendum est esse illos deos?

⁴⁰Adhuc etiam ipsi Chaldaei non honorant ea; qui cum viderint mutum non posse loqui, afferunt Bel postulantes illum loqui,

⁴¹quasi ipse possit sentire. Et non possunt ipsi, cum intellexerint, relinquere ea; sensum enim non habent.

⁴²Mulieres autem circumdatae funibus in viis sedent succendentes furfurem;

⁴³cum autem aliqua ex ipsis, attracta ab aliquo transeunte, dormierit cum eo, proximae suae exprobrat quod ea non sit digna habita, sicut ipsa, neque funis eius diruptus.

⁴⁴Omnia autem, quae illis fiunt, falsa sunt; quomodo ergo aestimandum est aut dicendum illos esse deos?

⁴⁵A fabris et ab aurificibus facti sunt; nihil aliud erunt, nisi id quod volunt artifices.

⁴⁶Ipsi etiam, qui ea faciunt, non erunt multi temporis; itaque numquid possunt, quae ab ipsis fabricata sunt, esse dii?

⁴⁷Reliquerunt enim falsa et opprobrium postea futuris.

⁴⁸Nam cum supervenerit illis proelium et mala, cogitant apud se sacerdotes, ubi se abscondant cum illis.

⁴⁹Quomodo ergo non est sentiendum quia non sunt dii, qui nec liberant se de bello nec de malis?

⁵⁰Nam cum sint lignea et inaurata et inargentata, scietur postea quia falsa sunt; gentibus universis et regibus manifestum erit quia non sunt dii sed opera manuum hominum, et nullum Dei opus in illis est.

⁵¹Cui ergo non notum est quod non sunt dii?

⁵²Regem enim regioni non suscitabunt neque pluviam hominibus dabunt.

⁵³Iudicium quoque eorum non discernent nec regiones liberabunt iniuriam patientes, quia nihil possunt sicut corniculae inter medium caeli et terrae.

⁵⁴Etenim cum inciderit in domum deorum ligneorum vel inauratorum vel inargentatorum ignis, sacerdotes quidem ipsorum fugient et liberabuntur; ipsi vero sicut trabes in medio comburentur.

⁵⁵Regi autem et hostibus non resistent. Quomodo ergo aestimandum est aut recipiendum quia dii sunt?

⁵⁶Neque a furibus neque a latronibus se liberabunt dii lignei et inaurati et inargentati;

⁵⁷quibus hi fortiores sunt, quia aurum et argentum et vestimentum, quo operti sunt, auferent illis et abibunt; nec illi sibi auxilium ferent.

⁵⁸Itaque melius est esse regem ostentantem virtutem suam aut vas in domo utile, quo uti potest is, qui possidet illud, quam falsi dii, aut etiam ostium in domo, quod custodit, quae in ea sunt, quam falsi dii, et columna lignea in regiis quam falsi dii.

⁵⁹Sol quidem et luna et sidera, cum sint splendida et emissa ad utilitates, oboediunt;

⁶⁰similiter et fulgur cum apparuerit, perspicuum est; eodem modo et spiritus in omni regione spirat;

⁶¹et nubes, quibus cum imperatum fuerit a Deo perambulare universum orbem, perficiunt, quod imperatum est;

⁶²ignis etiam missus desuper, ut consumat montes et silvas, facit, quod praeceptum est: haec autem neque speciebus neque virtutibus uni eorum similia sunt.

⁶³Unde neque aestimandum est neque dicendum illos esse deos, quando non possunt neque iudicium iudicare neque benefacere hominibus.

⁶⁴Scientes itaque quia non sunt dii, ne timueritis eos.

⁶⁵Neque enim regibus maledicent neque benedicent.

⁶⁶Signa in caelo gentibus non ostendent neque ut sol lucebunt neque illuminabunt sicut luna.

⁶⁷Bestiae meliores sunt illis, quae possunt, fugientes sub tegumentum, prodesse sibi.

⁶⁸Nullo itaque modo nobis est manifestum quia sunt dii; propter quod ne timueritis eos.

⁶⁹Nam sicut in cucumerario formido nihil custodit, ita sunt dii illorum lignei et inaurati et inargentati.

⁷⁰Eodem modo et in horto spinae albae, super quam omnis avis sedet; similiter et mortuo proiecto in tenebris similes sunt dii eorum lignei et inaurati et inargentati.

⁷¹A purpura et bysso, quae super illos tineant, scietis quia non sunt dii; ipsa etiam postremo comeduntur, et erit opprobrium in regione.

⁷²Melior est ergo homo iustus, qui non habet simulacra, nam erit longe ab opprobriis.