Read Nova_Vulgata DC Ezechielis 48 Bible Online

Ezechielis 48 - Nova_Vulgata DC bible

Ezechielis 48

¹Et haec nomina tribuum: in finibus aquilonis iuxta viam Hethalon ad introitum Emath, Asarenon - fines Damasci ad aquilonem iuxta Emath - erit a plaga orientali usque ad mare, Dan pars una.

²Et iuxta terminum Dan a plaga orientali usque ad plagam maris, Aser una.

³Et iuxta terminum Aser a plaga orientali usque ad plagam maris, Nephthali una.

⁴Et iuxta terminum Nephthali a plaga orientali usque ad plagam maris, Manasse una.

⁵Et iuxta terminum Manasse a plaga orientali usque ad plagam maris, Ephraim una.

⁶Et iuxta terminum Ephraim a plaga orientali usque ad plagam maris, Ruben una.

⁷Et iuxta terminum Ruben a plaga orientali usque ad plagam maris, Iudae una.

⁸Et iuxta terminum Iudae a plaga orientali usque ad plagam maris oblatio, quam separabitis viginti quinque milibus latitudinis et longitudinis, sicuti singulae partes a plaga orientali usque ad plagam maris; et erit sanctuarium in medio eius.

⁹Oblatio, quam separabitis Domino, longitudo viginti quinque milibus et latitudo viginti milibus.

¹⁰His autem est oblatio sacra: sacerdotibus, ad aquilonem viginti quinque milia et ad mare latitudinis decem milia et ad orientem latitudinis decem milia et ad meridiem longitudinis viginti quinque milia; et erit sanctuarium Domini in medio eius.

¹¹Sacerdotibus consecratis erit, filiis Sadoc, qui custodierunt caeremonias meas et non erraverunt, cum errarent filii Israel, sicut erraverunt Levitae.

¹²Et erit eis oblatio de oblatione terrae sanctum sanctorum iuxta terminum Levitarum;

¹³sed et Levitis similiter secundum fines sacerdotum, viginti quinque milia longitudinis et latitudinis decem milia, totum in longitudine viginti et quinque milia et in latitudine viginti milia;

¹⁴et non venumdabunt ex eo neque mutabunt, neque transferetur oblatio terrae, quia sanctificata est Domino.

¹⁵Quinque milia autem, quae supersunt in latitudine per viginti quinque milia, profana erunt urbi in habitaculum et in pascua, et erit civitas in medio eius.

¹⁶Et hae mensurae eius: ad plagam septentrionalem quingenti et quattuor milia et ad plagam meridianam quingenti et quattuor milia et ad plagam orientalem quingenti et quattuor milia et ad plagam occidentalem quingenti et quattuor milia.

¹⁷Erunt autem pascua civitatis ad aquilonem ducenti quinquaginta et ad meridiem ducenti quinquaginta et ad orientem ducenti quinquaginta et ad mare ducenti quinquaginta.

¹⁸Quod autem reliquum fuerit in longitudine iuxta oblationem sacram, decem milia ad orientem et decem milia ad occidentem, erunt iuxta oblationem sacram, et erunt fruges eius in panem his, qui serviunt civitati.

¹⁹Servientes autem civitati operabuntur ex omnibus tribubus Israel.

²⁰Tota oblatio viginti quinque milium, per viginti quinque milia: in quadrum; separabitis oblationem sacram una cum possessione civitatis.

²¹Quod autem reliquum fuerit, principis erit, ex utraque parte oblationis sacrae et possessionis civitatis, e regione viginti quinque milium oblationis usque ad terminum orientalem, sed et ad mare e regione viginti quinque milium usque ad terminum maris secundum partes tribuum, principis erit. Et erit oblatio sacra et sanctuarium templi in medio eius,

²²segregata a possessione Levitarum et a possessione civitatis in medio partium principis: inter terminum Iudae et inter terminum Beniamin erit possessio principis.

²³Et reliquis tribubus: a plaga orientali usque ad plagam occidentalem, Beniamin una.

²⁴Et iuxta terminum Beniamin a plaga orientali usque ad plagam occidentalem, Simeon una.

²⁵Et iuxta terminum Simeonis a plaga orientali usque ad plagam occidentalem, Issachar una.

²⁶Et iuxta terminum Issachar a plaga orientali usque ad plagam occidentalem, Zabulon una.

²⁷Et iuxta terminum Zabulon a plaga orientali usque ad plagam maris, Gad una.

²⁸Et iuxta terminum Gad ad plagam austri in meridiem, erit finis de Thamar usque ad aquas Meribathcades, ad torrentem usque ad mare Magnum.

²⁹Haec est terra, quam mittetis in sortem tribubus Israel, et hae partitiones earum, ait Dominus Deus.

³⁰Et hi egressus civitatis: a plaga septentrionali, cuius mensura quingenti et quattuor milia,

³¹portae civitatis in nominibus tribuum Israel: portae tres a septentrione, porta Ruben una, porta Iudae una, porta Levi una.

³²Et ad plagam orientalem quingentorum et quattuor milium, portae tres: porta Ioseph una, porta Beniamin una, porta Dan una.

³³Et ad plagam meridianam, cuius mensura quingenti et quattuor milia, portae tres: porta Simeonis una, porta Issachar una, porta Zabulon una.

³⁴Et ad plagam occidentalem quingentorum et quattuor milium, portae tres: porta Gad una, porta Aser una, porta Nephthali una.

³⁵Per circuitum decem et octo milia, et nomen civitatis ex illa die: Dominus ibidem".