Read Nova_Vulgata DC Numeri 22 Bible Online

Numeri 22 - Nova_Vulgata DC bible

Numeri 22

¹Profectique castrametati sunt filii Israel in campestri bus Moab, ubi trans Iordanem Iericho sita est.

²Videns autem Balac filius Sephor omnia, quae fecerat Israel Amorraeo,

³valde metuit Moab populum, quia multus erat. Et cum pertimeret Moab filios Israel,

⁴dixit ad maiores natu Madian: "Nunc carpet haec congregatio omnem regionem per circuitum, quomodo solet bos herbas campi carpere".Balac filius Sephor erat eo tempore rex in Moab.

⁵Misit ergo nuntios ad Balaam filium Beor in Phethor, quae est super flumen in terra filiorum Ammau, ut vocarent eum et dicerent: "Ecce egressus est populus ex Aegypto, qui operuit superficiem terrae sedens contra me.

⁶Veni igitur et maledic populo huic, quia fortior me est; si quo modo possim percutere et eicere eum de terra mea. Novi enim quod benedictus sit, cui benedixeris, et maledictus, in quem maledicta congesseris".

⁷Perrexeruntque seniores Moab et maiores natu Madian habentes divinationis pretium in manibus. Cumque venissent ad Balaam et narrassent ei omnia verba Balac,

⁸ille respondit: "Manete hic nocte, et respondebo quidquid mihi dixerit Dominus". Manentibus illis apud Balaam,

⁹venit Deus et ait ad eum: "Quid sibi volunt homines isti apud te?".

¹⁰Respondit: "Balac filius Sephor rex Moabitarum misit ad me

¹¹dicens: "Ecce populus, qui egressus est de Aegypto, operuit superficiem terrae; veni et maledic ei pro me, si quo modo possim pugnans abigere eum".

¹²Dixitque Deus ad Balaam: "Noli ire cum eis neque maledicas populo, quia benedictus est".

¹³Qui mane consurgens dixit ad principes: "Ite in terram vestram, quia prohibuit me Dominus venire vobiscum".

¹⁴Reversi principes dixerunt ad Balac: "Noluit Balaam venire nobiscum".

¹⁵Rursum ille multo plures et nobiliores, quam ante miserat, misit.

¹⁶Qui cum venissent ad Balaam, dixerunt: "Sic dicit Balac filius Sephor: "Ne cuncteris venire ad me;

¹⁷paratus sum honorare te et, quidquid volueris, dabo tibi. Veni et maledic pro me populo isti".

¹⁸Respondit Balaam: "Si dederit mihi Balac plenam domum suam argenti et auri, non potero transgredi verbum Domini Dei mei, ut vel plus vel minus loquar.

¹⁹Obsecro, ut hic maneatis etiam hac nocte, et scire queam quid mihi rursum respondeat Dominus".

²⁰Venit ergo Deus ad Balaam nocte et ait ei: "Si vocare te venerunt homines isti, surge et vade cum eis, ita dumtaxat, ut, quod tibi praecepero, facias".

²¹Surrexit Balaam mane et, strata asina sua, profectus est cum eis.

²²Et iratus est Deus, cum profectus esset; stetitque angelus Domini in via contra Balaam, ut adversaretur ei, qui insidebat asinae et duos pueros habebat secum.

²³Cernens asina angelum Domini stantem in via, evaginato gladio in manu sua, avertit se de itinere et ibat per agrum. Quam cum verberaret Balaam et vellet ad semitam reducere,

²⁴stetit angelus Domini in angustiis duarum maceriarum, quibus vineae cingebantur.

²⁵Quem videns asina iunxit se parieti et attrivit sedentis pedem. At ille iterum verberabat eam;

²⁶et angelus Domini iterum transiens ad locum angustum, ubi nec ad dexteram nec ad sinistram poterat deviare, obvius stetit.

²⁷Cumque vidisset asina stantem angelum Domini, concidit sub pedibus sedentis; qui iratus vehementius caedebat fuste latera eius.

²⁸Aperuitque Dominus os asinae, et locuta est: "Quid feci tibi? Cur percutis me ecce iam tertio?".

²⁹Respondit Balaam: "Quia illusisti mihi. Utinam haberem gladium, ut te interficerem!".

³⁰Dixit asina: "Nonne animal tuum sum, cui semper sedere consuevisti usque in praesentem diem? Dic quid simile umquam fecerim tibi". At ille ait: "Numquam".

³¹Protinus aperuit Dominus oculos Balaam, et vidit angelum Domini stantem in via, evaginato gladio in manu eius; adoravitque eum pronus in terram.

³²Cui angelus Domini: "Cur, inquit, tertio verberas asinam tuam? Ego veni, ut adversarer tibi, quia perversa est via tua mihique contraria.

³³Et videns me asina declinavit ter a me; nisi declinasset, te occidissem et illam vivam reliquissem".

³⁴Dixit Balaam: "Peccavi nesciens quod tu stares contra me in via; et nunc, si displicet tibi, revertar".

³⁵Ait angelus Domini: "Vade cum istis et cave, ne aliud, quam praecepero tibi, loquaris". Ivit igitur cum principibus Balac.

³⁶Quod cum audisset Balac, venisse scilicet Balaam, egressus est in occursum eius in Irmoab, quod situm est in extremis finibus Arnon;

³⁷dixitque ad Balaam: "Nonne misi nuntios, ut vocarem te? Cur non statim venisti ad me? An quia honorare te nequeo?".

³⁸Cui ille respondit: "Ecce adsum; numquid loqui potero aliud, nisi quod Deus posuerit in ore meo?".

³⁹Perrexerunt ergo simul et venerunt in Cariathusoth.

⁴⁰Cumque occidisset Balac boves et oves, misit ad Balaam et principes, qui cum eo erant.

⁴¹Mane autem facto, duxit eum ad excelsa Baal et intuitus est extremam partem populi.