Read Nova_Vulgata DC Numeri 28 Bible Online

Numeri 28 - Nova_Vulgata DC bible

Numeri 28

¹Dixit quoque Dominus ad Moysen:

²" Praecipe filiis Is rael et dices ad eos: Oblationem meam et panem meum, sacrificium ignis in odorem suavissimum offerte per tempora sua.

³Hoc est sacrificium ignis, quod offerre debetis: agnos anniculos immaculatos duos cotidie in holocaustum sempiternum;

⁴unum offeretis mane et alterum ad vesperam;

⁵decimam partem ephi similae in oblationem, quae conspersa sit oleo purissimo et habeat quartam partem hin.

⁶Holocaustum iuge est, quod obtulistis in monte Sinai in odorem suavissimum, sacrificium ignis Domino;

⁷et libabitis vini quartam partem hin per agnos singulos; in sanctuario effundetis libamen potus inebriantis Domino.

⁸Alterumque agnum similiter offeretis ad vesperam, iuxta ritum sacrificii matutini: sacrificium ignis in odorem suavissimum Domino.

⁹Die autem sabbati offeretis duos agnos anniculos immaculatos et duas decimas similae oleo conspersae et libamentum eius.

¹⁰Est holocaustum sabbati per singula sabbata, praeter holocaustum sempiternum et libamentum eius.

¹¹In calendis autem offeretis holocaustum Domino vitulos de armento duos, arietem unum, agnos anniculos septem immaculatos

¹²et tres decimas similae oleo conspersae in oblatione per singulos vitulos et duas decimas similae oleo conspersae per singulos arietes,

¹³et decimam unam similae oleo conspersae in oblatione per agnos singulos: holocaustum in odorem suavissimum, sacrificium ignis Domino.

¹⁴Libamenta autem eorum ista erunt: media pars hin vini per singulos vitulos, tertia per arietem, quarta per agnum. Hoc erit holocaustum per omnes menses, qui sibi anno vertente succedunt.

¹⁵Hircus quoque offeretur Domino pro peccato, praeter holocaustum sempiternum cum libamentis suis.

¹⁶Mense autem primo, quarta decima die mensis Pascha Domini erit,

¹⁷et quinta decima die sollemnitas. Septem diebus vescemini azymis,

¹⁸quarum die prima conventus sanctus erit; omne opus servile non facietis in ea.

¹⁹Offeretisque sacrificium ignis, holocaustum Domino: vitulos de armento duos, arietem unum, agnos anniculos immaculatos septem;

²⁰et oblationem singulorum ex simila, quae conspersa sit oleo, tres decimas per singulos vitulos et duas decimas per arietem

²¹et decimam unam per agnos singulos, id est per septem agnos;

²²et hircum pro peccato unum, ut expietur pro vobis,

²³praeter holocaustum matutinum, quod semper offeretis.

²⁴Ita facietis per singulos dies septem dierum: panem, sacrificium ignis in odorem suavissimum Domino praeter holocaustum iuge et libationem eius.

²⁵Die quoque septimo conventus sanctus erit vobis; omne opus servile non facietis in eo.

²⁶Die etiam primitivorum, quando offeretis oblationem novam Domino, in sollemnitate Hebdomadarum, conventus sanctus erit vobis; omne opus servile non facietis in ea.

²⁷Offeretisque holocaustum in odorem suavissimum Domino: vitulos de armento duos, arietem unum et agnos anniculos immaculatos septem,

²⁸atque in oblatione eorum similae oleo conspersae, tres decimas per singulos vitulos, per arietem duas,

²⁹per agnos decimam unam, qui simul sunt agni septem;

³⁰hircum quoque, qui mactatur pro expiatione,

³¹praeter holocaustum sempiternum et oblationem eius. Immaculata offeretis omnia cum libationibus suis.