Read Nova_Vulgata DC Numeri 3 Bible Online

Numeri 3 - Nova_Vulgata DC bible

Numeri 3

¹Hae sunt generationes Aaron et Moysi in die, qua locutus est Dominus ad Moysen in monte Sinai.

²Et haec nomina filiorum Aaron: primogenitus eius Nadab, deinde Abiu et Eleazar et Ithamar.

³Haec nomina filiorum Aaron sacerdotum, qui uncti sunt et quorum repletae manus, ut sacerdotio fungerentur.

⁴Mortui sunt enim Nadab et Abiu, cum offerrent ignem alienum in conspectu Domini in deserto Sinai, absque liberis; functique sunt sacerdotio Eleazar et Ithamar coram Aaron patre suo.

⁵Locutusque est Dominus ad Moysen dicens:

⁶" Applica tribum Levi et fac stare in conspectu Aaron sacerdotis, ut ministrent ei

⁷et observent, quidquid ad eum pertinet et ad totam congregationem coram tabernaculo conventus, servientes in ministerio habitaculi,

⁸et custodiant vasa tabernaculi conventus explentes officia filiorum Israel, servientes in ministerio habitaculi.

⁹Dabisque dono Levitas Aaron et filiis eius, quibus traditi sunt a filiis Israel;

¹⁰Aaron autem et filios eius constitues super cultum sacerdotii. Externus, qui ad ministrandum accesserit, morietur".

¹¹Locutusque est Dominus ad Moysen dicens:

¹²" Ecce ego tuli Levitas a filiis Israel pro omni primogenito, qui aperit vulvam in filiis Israel; eruntque Levitae mei.

¹³Meum est enim omne primogenitum: ex quo percussi omnes primogenitos in terra Aegypti, sanctificavi mihi, quidquid primum nascitur in Israel ab homine usque ad pecus; mei sunt. Ego Dominus".

¹⁴Locutusque est Dominus ad Moysen in deserto Sinai dicens:

¹⁵" Numera filios Levi per domos patrum suorum et familias omnem masculum ab uno mense et supra".

¹⁶Numeravit eos Moyses, ut praeceperat Dominus,

¹⁷et inventi sunt filii Levi per nomina sua Gerson et Caath et Merari.

¹⁸Haec sunt nomina filiorum Gerson secundum familias suas: Lobni et Semei;

¹⁹filii Caath secundum familias suas: Amram et Isaar, Hebron et Oziel;

²⁰filii Merari secundum familias suas: Moholi et Musi. Hae sunt familiae Levi per domos patrum suorum.

²¹De Gerson fuere familiae duae Lobnitica et Semeitica,

²²quarum numeratus est omnis populus sexus masculini ab uno mense et supra septem milia quingenti.

²³Hi post habitaculum metabantur ad occidentem

²⁴sub principe Eliasaph filio Lael;

²⁵et habebant excubias in tabernaculo conventus, ipsum habitaculum et tabernaculum, operimentum eius, velum, quod trahitur ante fores tabernaculi conventus,

²⁶et cortinas atrii, velum quoque, quod appenditur in introitu atrii, quod est circa habitaculum et circa altare, et funes ad omne opus eius.

²⁷Caath habet familias: Amramitas et Isaaritas et Hebronitas et Ozielitas; hae sunt familiae Caathitarum.

²⁸Omnes generis masculini ab uno mense et supra octo milia sescenti habebant excubias sanctuarii.

²⁹Familiae filiorum Caath castrametabantur ad latus habitaculi ad meridianam plagam,

³⁰princepsque eorum erat Elisaphan filius Oziel.

³¹Et custodiebant arcam mensamque et candelabrum, altaria et vasa sanctuarii, in quibus ministratur, et velum cunctamque huiuscemodi supellectilem.

³²Princeps autem principum Levitarum Eleazar filius Aaron sacerdotis erat super excubitores custodiae sanctuarii.

³³At vero de Merari erant familiae Moholitae et Musitae.

³⁴Omnes generis masculini ab uno mense et supra sex milia ducenti;

³⁵princeps familiarum Merari Suriel filius Abihail. In plaga septentrionali ad latus habitaculi castrametabantur;

³⁶erant sub custodia eorum tabulae habitaculi et vectes et columnae ac bases earum et cuncta vasa eius et omnia, quae ad cultum huiuscemodi pertinent,

³⁷columnaeque atrii per circuitum cum basibus suis et paxilli cum funibus.

³⁸Castrametabantur ante habitaculum, ad orientalem plagam ante tabernaculum conventus ad orientem, Moyses et Aaron cum filiis suis habentes custodiam sanctuarii in medio filiorum Israel. Quisquis alienus accesserit, morietur.

³⁹Omnes Levitae, quos numeravit Moyses iuxta praeceptum Domini per familias suas in genere masculino a mense uno et supra, fuerunt viginti duo milia.

⁴⁰Et ait Dominus ad Moysen: "Numera omnes primogenitos sexus masculini de filiis Israel ab uno mense et supra et habebis summam eorum;

⁴¹tollesque Levitas mihi pro omni primogenito filiorum Israel ego sum Dominus et pecora eorum pro universis primogenitis pecorum filiorum Israel".

⁴²Recensuit Moyses, sicut praeceperat Dominus, omnes primogenitos filiorum Israel,

⁴³et fuerunt omnes masculi per nomina sua a mense uno et supra viginti duo milia ducenti septuaginta tres.

⁴⁴Locutusque est Dominus ad Moysen dicens:

⁴⁵" Tolle Levitas pro omnibus primogenitis filiorum Israel et pecora Levitarum pro pecoribus corum; eruntque Levitae mei. Ego sum Dominus.

⁴⁶In pretio autem ducentorum septuaginta trium, qui excedunt numerum Levitarum de primogenitis filiorum Israel,

⁴⁷accipies quinque siclos per singula capita, ad mensuram sanctuarii. Siclus habet viginti obolos.

⁴⁸Dabisque pecuniam Aaron et filiis eius pretium eorum, qui supra sunt".

⁴⁹Tulit igitur Moyses pecuniam eorum, qui excesserant numerum eorum, qui redempti erant a Levitis;

⁵⁰a primogenitis filiorum Israel tulit pecuniam mille trecentorum sexaginta quinque siclorum iuxta pondus sanctuarii.

⁵¹Et dedit eam Aaron et filiis eius iuxta verbum, quod praeceperat sibi Dominus.