Read Nova_Vulgata DC Numeri 31 Bible Online

Numeri 31 - Nova_Vulgata DC bible

Numeri 31

¹Locutusque est Dominus ad Moysen dicens:

²" Ulciscere filios Israel de Madianitis et sic colligeris ad populum tuum".

³Statimque Moyses: "Armate, inquit, ex vobis viros ad pugnam, qui possint ultionem Domini expetere de Madianitis.

⁴Mille viri de singulis tribubus eligantur ex Israel, qui mittantur ad bellum".

⁵Dederuntque millenos de singulis tribubus, id est duodecim milia expeditorum ad pugnam,

⁶quos misit Moyses cum Phinees filio Eleazari sacerdotis. Vasa quoque sancta et tubas ad clangendum tradidit ei.

⁷Cumque pugnassent contra Madianitas, sicut praeceperat Dominus Moysi, omnes mares occiderunt

⁸et reges eorum Evi et Recem et Sur et Hur et Rebe, quinque principes gentis, Balaam quoque filium Beor interfecerunt gladio;

⁹ceperuntque mulieres eorum et parvulos. Omniaque pecora et cunctam supellectilem, quidquid habere potuerant, depopulati sunt:

¹⁰tam urbes quam viculos et castra flamma consumpsit;

¹¹et tulerunt praedam et universa, quae ceperant, tam ex hominibus quam ex iumentis,

¹²et adduxerunt captivos, spolia et praedam ad Moysen et Eleazarum sacerdotem et ad omnem congregationem filiorum Israel ad castra in campestribus Moab iuxta Iordanem contra Iericho.

¹³Egressi sunt autem Moyses et Eleazar sacerdos et omnes principes synagogae in occursum eorum extra castra.

¹⁴Iratusque Moyses principibus exercitus, tribunis et centurionibus, qui venerant de bello,

¹⁵ait: "Cur omnes feminas reservastis?

¹⁶Nonne istae sunt, quae deceperunt filios Israel ad suggestionem Balaam et praevaricari vos fecerunt in Dominum super peccato Phegor, unde et percussus est populus Domini?

¹⁷Ergo cunctos interficite parvulos generis masculini et omnes mulieres, quae noverunt viros in coitu, iugulate;

¹⁸puellas autem et omnes feminas virgines reservate vobis.

¹⁹Et vos manete extra castra septem diebus; qui occiderit hominem vel occisum tetigerit, lustrabitur die tertio et septimo, vos et captivi vestri.

²⁰Et de omni praeda, sive vestimentum fuerit sive aliquid in utensilia praeparatum de caprarum pellibus et pilis et ligno, lustrabitis".

²¹Eleazar quoque sacerdos ad viros exercitus, qui pugnaverant, sic locutus est: "Hoc est praeceptum legis, quod mandavit Dominus Moysi:

²²Aurum et argentum et aes et ferrum et stannum et plumbum,

²³omne, quod potest transire per flammas, igne purgabitur; quidquid autem ignem non potest sustinere, aqua expiationis sanctificabitur.

²⁴Et lavabitis vestimenta vestra die septimo, et purificati postea castra intrabitis".

²⁵Dixit quoque Dominus ad Moysen:

²⁶" Tollite summam eorum, quae capta sunt, ab homine usque ad pecus, tu et Eleazar sacerdos et principes familiarum;

²⁷dividesque ex aequo praedam inter eos, qui pugnaverunt egressique sunt ad bellum, et inter omnem congregationem.

²⁸Et separabis partem Domino ab his, qui pugnaverunt et fuerunt in bello, unam animam de quingentis tam ex hominibus quam ex bobus et asinis et ovibus

²⁹et dabis eam Eleazaro sacerdoti, quia praelibatio Domini sunt.

³⁰Ex media quoque parte filiorum Israel accipies quinquagesimum caput hominum et boum et asinorum et ovium cunctorum animantium et dabis ea Levitis, qui excubant in custodiis habitaculi Domini".

³¹Feceruntque Moyses et Eleazar sacerdos, sicut praeceperat Dominus.

³²Fuit autem praeda, quae supererat, quam exercitus ceperat, ovium sescenta septuaginta quinque milia,

³³boum septuaginta duo milia,

³⁴asinorum sexaginta milia et mille,

³⁵animae hominum sexus feminei, quae non cognoverant viros, triginta duo milia.

³⁶Dataque est media pars his, qui in proelio fuerant, ovium trecenta triginta septem milia quingentae,

³⁷e quibus in partem Domini supputatae sunt oves sescentae septuaginta quinque,

³⁸et de bobus triginta sex milibus, boves septuaginta et duo,

³⁹de asinis triginta milibus quingentis, asini sexaginta unus,

⁴⁰de animabus hominum sedecim milibus, cesserunt in partem Domini triginta duae animae.

⁴¹Tradiditque Moyses tributum praelibationis Domini Eleazaro sacerdoti, sicut fuerat ei imperatum.

⁴²Ex media vero parte filiorum Israel, quam separaverat a parte eorum, qui in proelio fuerant,

⁴³de hac media parte, quae contigerat congregationi, id est de ovibus trecentis triginta septem milibus quingentis

⁴⁴et de bobus triginta sex milibus

⁴⁵et de asinis triginta milibus quingentis

⁴⁶et de hominibus sedecim milibus,

⁴⁷tulit Moyses quinquagesimum caput et dedit Levitis, qui excubabant in habitaculo Domini, sicut praeceperat Dominus.

⁴⁸Cumque accessissent principes exercitus ad Moysen, tribuni centurionesque, dixerunt:

⁴⁹" Nos servi tui recensuimus numerum pugnatorum, quos habuimus sub manu nostra, et ne unus quidem defuit.

⁵⁰Ob hanc causam offerimus in donariis Domini singuli, quod auri potuimus invenire, periscelidas et armillas, anulos et inaures ac muraenulas, ad placandum pro nobis Dominum".

⁵¹Susceperuntque Moyses et Eleazar sacerdos aurum in diversis speciebus;

⁵²omne aurum, quod elevaverunt Domino, pondo sedecim milia septingentos quinquaginta siclos, a tribunis et centurionibus.

⁵³Unusquisque enim, quod in praeda rapuerat, suum erat.

⁵⁴Et susceptum intulerunt in tabernaculum conventus in monumentum filiorum Israel coram Domino.