Read Nova_Vulgata DC Zachariae 2 Bible Online

Zachariae 2 - Nova_Vulgata DC bible

Zachariae 2

¹Et levavi oculos meos et vidi, et ecce quattuor cornua;

²et dixi ad angelum, qui loquebatur in me: "Quid sunt haec?". Et dixit ad me: "Haec sunt cornua, quae ventilaverunt Iudam et Israel et Ierusalem".

³Et ostendit mihi Dominus quattuor fabros;

⁴et dixi: "Quid isti veniunt facere?". Qui respondit dicens: "Haec sunt cornua, quae ventilaverunt Iudam per singulos viros, ut nemo eorum levaret caput suum; et venerunt isti deterrere ea, ut deiciant cornua gentium, quae levaverunt cornu super terram Iudae, ut dispergerent eam".

⁵Et levavi oculos meos et vidi; et ecce vir, et in manu eius funiculus mensorum.

⁶Et dixi: "Quo tu vadis?". Et dixit ad me: "Ut metiar Ierusalem et videam, quanta sit latitudo eius et quanta longitudo eius".

⁷Et ecce angelus, qui loquebatur in me, egrediebatur, et angelus alius egrediebatur in occursum eius;

⁸et dixit ad eum: "Curre, loquere ad puerum istum dicens: Absque muris habitabitur Ierusalem prae multitudine hominum et iumentorum in medio eius.

⁹Et ego ero ei, ait Dominus, murus ignis in circuitu et in gloria ero in medio eius.

¹⁰Heu, heu! Fugite de terra aquilonis, dicit Dominus, quoniam in quattuor ventos caeli dispersi vos, dicit Dominus.

¹¹Heu, Sion, fuge, quae habitas apud filiam Babylonis!

¹²Quia haec dicit Dominus exercituum, cuius gloria misit me ad gentes, quae spoliaverunt vos: Qui tetigerit vos, tangit pupillam oculi mei.

¹³Quia ecce ego levo manum meam super eos, et erunt praeda servorum suorum; et cognoscetis quia Dominus exercituum misit me.

¹⁴Iubila et laetare, filia Sion,quia ecce ego venioet habitabo in medio tui,ait Dominus.

¹⁵Et applicabuntur gentes multaead Dominum in die illaet erunt ei in populum.Et habitabo in medio tui,et scies quia Dominus exercituummisit me ad te.

¹⁶Et possidebit Dominus Iudampartem suam super terram sanctamet eliget adhuc Ierusalem.

¹⁷Sileat omnis caro a facie Domini,quia consurrexit de habitaculo sancto suo".