Read Nova_Vulgata DC Machabaeorum liber I 1 Bible Online

Machabaeorum liber I 1 - Nova_Vulgata DC bible

Machabaeorum liber I 1

¹Et factum est, postquam per cussit Alexander Philippi Mace do, qui prius regnavit in Graecia, egressus de terra Cetthim, Darium regem Persarum et Medorum,

²constituit proelia multa et obtinuit munitiones et interfecit reges terrae;

³et pertransiit usque ad fines terrae et accepit spolia multitudinis gentium, et siluit terra in conspectu eius, et exaltatum est et elevatum est cor eius.

⁴Et congregavit virtutem fortem nimis et obtinuit regiones gentium et tyrannos, et facti sunt illi in tributum.

⁵Et post haec decidit in lectum et cognovit quia moreretur;

⁶et vocavit pueros suos nobiles, qui secum erant nutriti a iuventute, et divisit illis regnum suum, cum adhuc viveret.

⁷Et regnavit Alexander annis duodecim et mortuus est.

⁸Et obtinuerunt pueri eius regnum, unusquisque in loco suo;

⁹et imposuerunt omnes sibi diademata post mortem eius, et filii eorum post eos annis multis. Et multiplicata sunt mala in terra.

¹⁰Et exiit ex eis radix peccatrix, Antiochus Epiphanes filius Antiochi regis, qui fuerat Romae obses, et regnavit in anno centesimo tricesimo septimo regni Graecorum.

¹¹In diebus illis exierunt ex Israel filii iniqui et suaserunt multis dicentes: “ Eamus et disponamus testamentum cum gentibus, quae circa nos sunt, quia, ex quo recessimus ab eis, invenerunt nos multa mala ”.

¹²Et bonus visus est sermo in oculis eorum;

¹³et destinaverunt aliqui de populo et abierunt ad regem, et dedit illis potestatem, ut facerent iustitias gentium.

¹⁴Et aedificaverunt gymnasium in Hierosolymis secundum leges nationum;

¹⁵et fecerunt sibi praeputia et recesserunt a testamento sancto et iuncti sunt nationibus et venumdati sunt, ut facerent malum.

¹⁶Et paratum est regnum in conspectu Antiochi, et coepit regnare in terra Aegypti, ut regnaret super duo regna.

¹⁷Et intravit in Aegyptum in multitudine gravi, in curribus et elephantis et equitibus et navium multitudine;

¹⁸et constituit bellum adversus Ptolemaeum regem Aegypti, et veritus est Ptolemaeus a facie eius et fugit, et ceciderunt vulnerati multi.

¹⁹Et comprehenderunt civitates munitas in terra Aegypti, et accepit spolia terrae Aegypti.

²⁰Et reversus est Antiochus, postquam percussit Aegyptum in centesimo et quadragesimo tertio anno, et ascendit ad Israel et ad Hierosolyma in multitudine gravi

²¹et intravit in sanctificationem cum superbia et accepit altare aureum et candelabrum luminis et universa vasa eius

²²et mensam propositionis et libatoria et phialas et pateras aureas et velum et coronas et ornamentum aureum, quod in facie templi erat; et comminuit omnia.

²³Et accepit argentum et aurum et vasa concupiscibilia et accepit thesauros occultos, quos invenit;

²⁴et, sublatis omnibus, abiit in terram suam et fecit caedem hominum et locutus est superbia magna.

²⁵Et factus est planctus magnus in Israel et in omni loco eorum;

²⁶et ingemuerunt principes et seniores, virgines et iuvenes infirmati sunt, et speciositas mulierum immutata est,

²⁷omnis maritus sumpsit lamentum, et, quae sedebat in toro maritali, lugebat;

²⁸et commota est terra super habitantes in ea, et universa domus Iacob induit confusionem.

²⁹Et post duos annos dierum misit rex principem tributorum in civitates Iudae et venit Ierusalem cum turba magna;

³⁰et locutus est ad eos verba pacifica in dolo, et crediderunt ei. Et irruit super civitatem repente et percussit eam plaga magna et perdidit populum multum ex Israel.

³¹Et accepit spolia civitatis et succendit eam igne et destruxit domos eius et muros eius in circuitu;

³²et captivas duxerunt mulieres et natos et pecora possederunt.

³³Et aedificaverunt civitatem David muro magno et firmo et turribus firmis; et facta est illis in arcem.

³⁴Et posuerunt illic gentem peccatricem, viros iniquos, et convaluerunt in ea;

³⁵et posuerunt arma et escas et, congregatis spoliis Ierusalem, reposuerunt illic; et facti sunt in laqueum magnum.

³⁶Et factum est hoc ad insidias sanctificationi et in diabolum malum in Israel semper;

³⁷et effuderunt sanguinem innocentem per circuitum sanctificationis et contaminaverunt sanctificationem.

³⁸Et fugerunt habitatores Ierusalem propter eos, et facta est habitatio exterorum, et facta est extera semini suo; et nati eius reliquerunt eam.

³⁹Sanctificatio eius desolata est sicut solitudo, dies festi eius conversi sunt in luctum, sabbata eius in opprobrium, honor eius in nihilum.

⁴⁰Secundum gloriam eius multiplicata est ignominia eius, et sublimitas eius conversa est in luctum.

⁴¹Et scripsit rex Antiochus omni regno suo, ut essent universi populus unus,

⁴²et relinqueret unusquisque legem suam. Et receperunt omnes gentes secundum verbum regis Antiochi;

⁴³et multi ex Israel consenserunt cultui eius et sacrificaverunt idolis et coinquinaverunt sabbatum.

⁴⁴Et misit rex libros per manus nuntiorum in Ierusalem et in civitates Iudae, ut sequerentur leges gentium terrae,

⁴⁵et prohibere holocausta et sacrificia et placationes fieri in templo Dei et contaminare sabbata et dies sollemnes

⁴⁶et polluere sancta et sanctos,

⁴⁷instruere aras et templa et idola et immolare porcina et pecora communia

⁴⁸et relinquere filios suos incircumcisos et polluere animas eorum in omni immundo et abominatione,

⁴⁹ita ut obliviscerentur legem et immutarent omnes iustificationes;

⁵⁰et, quicumque non fecerit secundum verbum regis Antiochi, morietur.

⁵¹Secundum omnia verba haec scripsit omni regno suo et praeposuit consideratores super omnem populum et mandavit civitatibus Iudae immolare per civitatem et civitatem.

⁵²Et congregati sunt multi de populo ad eos, omnes, qui dereliquerant legem Domini, et fecerunt mala in terra;

⁵³et posuerunt Israel in abditis et in absconditis fugitivorum locis.

⁵⁴Die quinta decima mensis Casleu, quinto et quadragesimo et centesimo anno, aedificavit abominationem desolationis super altare; et per civitates Iudae in circuitu aedificaverunt aras

⁵⁵et ante ianuas domorum et in plateis sacrificabant.

⁵⁶Et libros legis, quos invenerunt, combusserunt igne scindentes eos;

⁵⁷et ubicumque inveniebatur apud aliquem liber testamenti, et si quis consentiebat legi, constitutio regis interficiebat eum.

⁵⁸In virtute sua faciebant haec Israeli, omnibus, qui inveniebantur in omni mense et mense in civitatibus.

⁵⁹Et quinta et vicesima die mensis sacrificabant super aram, quae erat super altare;

⁶⁰et mulieres, quae circumciderant filios suos, interficiebant secundum iussum

⁶¹— et suspendebant infantes a cervicibus eorum — et domos eorum et eos, qui circumciderant illos.

⁶²Et multi in Israel obtinuerunt et confortati sunt apud se, ut non manducarent immunda,

⁶³et elegerunt mori, ut non polluerentur escis et non profanarent testamentum sanctum, et moriebantur.

⁶⁴Et facta est ira magna super Israel valde.