Read Nova_Vulgata DC Evangelium secundum Matthaeum 18 Bible Online

Evangelium secundum Matthaeum 18 - Nova_Vulgata DC bible

Evangelium secundum Matthaeum 18

¹In illa hora accesserunt di scipuli ad Iesum dicentes: "Quis putas maior est in regno caelorum?".

²Et advocans parvulum, statuit eum in medio eorum

³et dixit: "Amen dico vobis: Nisi conversi fueritis et efiiciamini sicut parvuli, non intrabitis in regnum caelorum.

⁴Quicumque ergo humiliaverit se sicut parvulus iste, hic est maior in regno caelorum.

⁵Et, qui susceperit unum parvulum talem in nomine meo, me suscipit.

⁶Qui autem scandalizaverit unum de pusillis istis, qui in me credunt, expedit ei, ut suspendatur mola asinaria in collo eius et demergatur in profundum maris.

⁷Vae mundo ab scandalis! Necesse est enim ut veniant scandala; verumtamen vae homini, per quem scandalum venit!

⁸Si autem manus tua vel pes tuus scandalizat te, abscide eum et proice abs te: bonum tibi est ad vitam ingredi debilem vel claudum, quam duas manus vel duos pedes habentem mitti in ignem aeternum.

⁹Et si oculus tuus scandalizat te, erue eum et proice abs te: bonum tibi est unoculum in vitam intrare, quam duos oculos habentem mitti in gehennam ignis.

¹⁰Videte, ne contemnatis unum ex his pusillis; dico enim vobis quia angeli eorum in caelis sempervident faciem Patris mei, qui in caelis est.

¹²Quid vobis videtur? Si fuerint alicui centum oves, et erraverit una ex eis, nonne relinquet nonaginta novem in montibus et vadit quaerere eam, quae erravit?

¹³Et si contigerit ut inveniat eam, amen dico vobis quia gaudebit super eam magis quam super nonaginta novem, quae non erraverunt.

¹⁴Sic non est voluntas ante Patrem vestrum, qui in caelis est, ut pereat unus de pusillis istis.

¹⁵Si autem peccaverit in te frater tuus, vade, corripe eum inter te et ipsum solum. Si te audierit, lucratus es fratrem tuum;

¹⁶si autem non audierit, adhibe tecum adhuc unum vel duos, ut in ore duorum testium vel trium stet omne verbum;

¹⁷quod si noluerit audire eos, dic ecclesiae; si autem et ecclesiam noluerit audire, sit tibi sicut ethnicus et publicanus.

¹⁸Amen dico vobis: Quaecumque alligaveritis super terram, erunt ligata in caelo; et, quaecumque solveritis super terram, erunt soluta in caelo.

¹⁹Iterum dico vobis: Si duo ex vobis consenserint super terram de omni re, quamcumque petierint, fiet illis a Patre meo, qui in caelis est.

²⁰Ubi enim sunt duo vel tres congregati in nomine meo, ibi sum in medio eorum".

²¹Tunc accedens Petrus dixit ei: "Domine, quotiens peccabit in me frater meus, et dimittam ei? Usque septies?".

²²Dicit illi Iesus: "Non dico tibi usque septies sed usque septuagies septies.

²³Ideo assimilatum est regnum caelorum homini regi, qui voluit rationem ponere cum servis suis.

²⁴Et cum coepisset rationem ponere, oblatus est ei unus, qui debebat decem milia talenta.

²⁵Cum autem non haberet, unde redderet, iussit eum dominus venumdari et uxorem et filios et omnia, quae habebat, et reddi.

²⁶Procidens igitur servus ille adorabat eum dicens: "Patientiam habe in me, et omnia reddam tibi".

²⁷Misertus autem dominus servi illius dimisit eum et debitum dimisit ei.

²⁸Egressus autem servus ille invenit unum de conservis suis, qui debebat ei centum denarios, et tenens suffocabat eum dicens: "Redde, quod debes!".

²⁹Procidens igitur conservus eius rogabat eum dicens: "Patientiam habe in me, et reddam tibi".

³⁰Ille autem noluit, sed abiit et misit eum in carcerem, donec redderet debitum.

³¹Videntes autem conservi eius, quae fiebant, contristati sunt valde et venerunt et narraverunt domino suo omnia, quae facta erant.

³²Tunc vocavit illum dominus suus et ait illi: "Serve nequam, omne debitum illud dimisi tibi, quoniam rogasti me;

³³non oportuit et te misereri conservi tui, sicut et ego tui misertus sum?".

³⁴Et iratus dominus eius tradidit eum tortoribus, quoadusque redderet universum debitum.

³⁵Sic et Pater meus caelestis faciet vobis, si non remiseritis unusquisque fratri suo de cordibus vestris".