Read Nova_Vulgata DC Evangelium secundum Matthaeum 19 Bible Online

Evangelium secundum Matthaeum 19 - Nova_Vulgata DC bible

Evangelium secundum Matthaeum 19

¹Et factum est, cum consum masset Iesus sermones istos, migravit a Galilaea et venit in fines Iudaeae trans Iordanem.

²Et secutae sunt eum turbae multae, et curavit eos ibi.

³Et accesserunt ad eum pharisaei tentantes eum et dicentes: "Licet homini dimittere uxorem suam quacumque ex causa?".

⁴Qui respondens ait: "Non legistis quia, qui creavit ab initio, masculum et feminam fecit eos

⁵et dixit: "Propter hoc dimittet homo patrem et matrem et adhaerebit uxori suae, et erunt duo in carne una?".

⁶Itaque iam non sunt duo sed una caro. Quod ergo Deus coniunxit, homo non separet".

⁷Dicunt illi: "Quid ergo Moyses mandavit dari libellum repudii et dimittere?".

⁸Ait illis: "Moyses ad duritiam cordis vestri permisit vobis dimittere uxores vestras; ab initio autem non sic fuit.

⁹Dico autem vobis quia quicumque dimiserit uxorem suam, nisi ob fornicationem, et aliam duxerit, moechatur".

¹⁰Dicunt ei discipuli eius: "Si ita est causa hominis cum uxore, non expedit nubere".

¹¹Qui dixit eis: "Non omnes capiunt verbum istud, sed quibus datum est.

¹²Sunt enim eunuchi, qui de matris utero sic nati sunt; et sunt eunuchi, qui facti sunt ab hominibus; et sunt eunuchi, qui seipsos castraverunt propter regnum caelorum. Qui potest capere, capiat".

¹³Tunc oblati sunt ei parvuli, ut manus eis imponeret et oraret; discipuli autem increpabant eis.

¹⁴Iesus vero ait: "Sinite parvulos et nolite eos prohibere ad me venire; talium est enim regnum caelorum".

¹⁵Et cum imposuisset eis manus, abiit inde.

¹⁶Et ecce unus accedens ait illi: "Magister, quid boni faciam, ut habeam vitam aeternam?". Qui dixit ei:

¹⁷Quid me interrogas de bono? Unus est bonus. Si autem vis ad vitam ingredi, serva mandata".

¹⁸Dicit illi: "Quae?". Iesus autem dixit: "Non homicidium facies, non adulterabis, non facies furtum, non falsum testimonium dices,

¹⁹honora patrem et matrem et diliges proximum tuum sicut teipsum".

²⁰Dicit illi adulescens: "Omnia haec custodivi. Quid adhuc mihi deest?.

²¹Ait illi Iesus: "Si vis perfectus esse, vade, vende, quae habes, et da pauperibus, et habebis thesaurum in caelo; et veni, sequere me".

²²Cum audisset autem adulescens verbum, abiit tristis; erat enim habens multas possessiones.

²³Iesus autem dixit discipulis suis: "Amen dico vobis: Dives difficile intrabit in regnum caelorum.

²⁴Et iterum dico vobis: Facilius est camelum per foramen acus transire, quam divitem intrare in regnum Dei".

²⁵Auditis autem his, discipuli mirabantur valde dicentes: "Quis ergo poterit salvus esse?".

²⁶Aspiciens autem Iesus dixit illis: "Apud homines hoc impossibile est, apud Deum autem omnia possibilia sunt".

²⁷Tunc respondens Petrus dixit ei: "Ecce nos reliquimus omnia et secuti sumus te. Quid ergo erit nobis?".

²⁸Iesus autem dixit illis: "Amen dico vobis quod vos, qui secuti estis me, in regeneratione, cum sederit Filius hominis in throno gloriae suae, sedebitis et vos super thronos duodecim, iudicantes duodecim tribus Israel.

²⁹Et omnis, qui reliquit domos vel fratres aut sorores aut patrem aut matrem aut filios aut agros propter nomen meum, centuplum accipiet et vitam aeternam possidebit.

³⁰Multi autem erunt primi novissimi, et novissimi primi.