Read Nova_Vulgata DC Evangelium secundum Marcum 8 Bible Online

Evangelium secundum Marcum 8 - Nova_Vulgata DC bible

Evangelium secundum Marcum 8

¹In illis diebus iterum cum turba multa esset nec haberent, quod manducarent, convocatis discipulis, ait illis:

²"Misereor super turbam, quia iam triduo sustinent me nec habent, quod manducent;

³et si dimisero eos ieiunos in domum suam, deficient in via; et quidam ex eis de longe venerunt".

⁴Et responderunt ei discipuli sui: "Unde istos poterit quis hic saturare panibus in solitudine?".

⁵Et interrogabat eos: "Quot panes habetis?. Qui dixerunt: "Septem".

⁶Et praecipit turbae discumbere supra terram; et accipiens septem panes, gratias agens fregit et dabat discipulis suis, ut apponerent; et apposuerunt turbae.

⁷Et habebant pisciculos paucos; et benedicens eos, iussit hos quoque apponi.

⁸Et manducaverunt et saturati sunt; et sustulerunt, quod superaverat de fragmentis, septem sportas.

⁹Erant autem quasi quattuor milia. Et dimisit eos.

¹⁰Et statim ascendens navem cum discipulis suis venit in partes Dalmanutha.

¹¹Et exierunt pharisaei et coeperunt conquirere cum eo quaerentes ab illo signum de caelo, tentantes eum.

¹²Et ingemiscens spiritu suo ait: "Quid generatio ista quaerit signum? Amen dico vobis: Non dabitur generationi isti signum".

¹³Et dimittens eos, iterum ascendens abiit trans fretum.

¹⁴Et obliti sunt sumere panes et nisi unum panem non habebant secum in navi.

¹⁵Et praecipiebat eis dicens: "Videte, cavete a fermento pharisaeorum et fermento Herodis!".

¹⁶Et disputabant ad invicem, quia panes non haberent.

¹⁷Quo cognito, ait illis: "Quid disputatis, quia panes non habetis? Nondum cognoscitis nec intellegitis? Caecatum habetis cor vestrum?

¹⁸Oculos habentes non videtis, et aures habentes non auditis? Nec recordamini,

¹⁹quando quinque panes fregi in quinque milia, quot cophinos fragmentorum plenos sustulistis?". Dicunt ei: "Duodecim".

²⁰Quando illos septem in quattuor milia, quot sportas plenas fragmentorum tulistis?". Et dicunt ei: "Septem".

²¹Et dicebat eis: "Nondum intellegitis?".

²²Et veniunt Bethsaida. Et adducunt ei caecum et rogant eum, ut illum tangat.

²³Et apprehendens manum caeci eduxit eum extra vicum; et exspuens in oculos eius, impositis manibus ei, interrogabat eum: "Vides aliquid?".

²⁴Et aspiciens dicebat: "Video homines, quia velut arbores video ambulantes".

²⁵Deinde iterum imposuit manus super oculos eius; et coepit videre et restitutus est et videbat clare omnia.

²⁶Et misit illum in domum suam dicens: "Nec in vicum introieris".

²⁷Et egressus est Iesus et discipuli eius in castella Caesareae Philippi; et in via interrogabat discipulos suos dicens eis: "Quem me dicunt esse homines?".

²⁸Qui responderunt illi dicentcs: "Ioannem Baptistam, alii Eliam, alii vero unum de prophetis".

²⁹Et ipse interrogabat eos: "Vos vero quem me dicitis esse?. Respondens Petrus ait ei: "Tu es Christus".

³⁰Et comminatus est eis, ne cui dicerent de illo.

³¹Et coepit docere illos: "Oportet Filium hominis multa pati et reprobari a senioribus et a summis sacerdotibus et scribis et occidi et post tres dies resurgere ";

³²et palam verbum loquebatur. Et apprehendens eum Petrus coepit increpare eum.

³³Qui conversus et videns discipulos suos comminatus est Petro et dicit: Vade retro me, Satana, quoniam non sapis, quae Dei sunt, sed quae sunt hominum".

³⁴Et convocata turba cum discipulis suis, dixit eis: "Si quis vult post me sequi, deneget semetipsum et tollat crucem suam et sequatur me.

³⁵Qui enim voluerit animam suam salvam facere, perdet eam; qui autem perdiderit animam suam propter me et evangelium, salvam eam faciet.

³⁶Quid enim prodest homini, si lucretur mundum totum et detrimentum faciat animae suae?

³⁷Quid enim dabit homo commutationem pro anima sua?

³⁸Qui enim me confusus fuerit et mea verba in generatione ista adultera et peccatrice, et Filius hominis confundetur eum, cum venerit in gloria Patris sui cum angelis sanctis".