Read Nova_Vulgata DC Evangelium secundum Lucam 4 Bible Online

Evangelium secundum Lucam 4 - Nova_Vulgata DC bible

Evangelium secundum Lucam 4

¹Iesus autem plenus Spiritu Sancto regressus est ab Iordane et agebatur in Spiritu in deserto

²diebus quadraginta et tentabatur a Diabolo. Et nihil manducavit in diebus illis et, consummatis illis, esuriit.

³Dixit autem illi Diabolus: "Si Filius Dei es, dic lapidi huic, ut panis fiat".

⁴Et respondit ad illum Iesus: "Scriptum est: "Non in pane solo vivet homo".

⁵Et sustulit illum et ostendit illi omnia regna orbis terrae in momento temporis;

⁶et ait ei Diabolus: "Tibi dabo potestatem hanc universam et gloriam illorum, quia mihi tradita est, et, cui volo, do illam:

⁷tu ergo, si adoraveris coram me, erit tua omnis".

⁸Et respondens Iesus dixit illi: "Scriptum est: "Dominum Deum tuum adorabis et illi soli servies".

⁹Duxit autem illum in Ierusalem et statuit eum supra pinnam templi et dixit illi: "Si Filius Dei es, mitte te hinc deorsum.

¹⁰Scriptum est enim:Angelis suis mandabit de te,ut conservent te"

¹¹et: "In manibus tollent te,ne forte offendas ad lapidem pedem tuum".

¹²Et respondens Iesus ait illi: "Non tentabis Dominum Deum tuum".

¹³Et consummata omni tentatione, Diabolus recessit ab illo usque ad tempus.

¹⁴Et regressus est Iesus in virtute Spiritus in Galilaeam. Et fama exiit per universam regionem de illo.

¹⁵Et ipse docebat in synagogis eorum et magnificabatur ab omnibus.

¹⁶Et venit Nazareth, ubi erat nutritus, et intravit secundum consuetudinem suam die sabbati in synagogam et surrexit legere.

¹⁷Et tradi tus est illi liber prophetae Isaiae; etut revolvit librum, invenit locum, ubi scriptum erat:

¹⁸"Spiritus Domini super me;propter quod unxit meevangelizare pauperibus,misit me praedicare captivis remissionemet caecis visum,dimittere confractos in remissione,

¹⁹praedicare annum Domini acceptum".

²⁰Et cum plicuisset librum, reddidit ministro et sedit; et omnium in synagoga oculi erant intendentes in eum.

²¹Coepit autem dicere ad illos: "Hodie impleta est haec Scriptura in auribus vestris".

²²Et omnes testimonium illi dabant et mirabantur in verbis gratiae, quae procedebant de ore ipsius, et dicebant: "Nonne hic filius est Ioseph?".

²³Et ait illis: "Utique dicetis mihi hanc similitudinem: "Medice, cura teipsum; quanta audivimus facta in Capharnaum, fac et hic in patria tua".

²⁴Ait autem: "Amen dico vobis: Nemo propheta acceptus est in patria sua.

²⁵In veritate autem dico vobis: Multae viduae erant in diebus Eliae in Israel, quando clausum est caelum annis tribus et mensibus sex, cum facta est fames magna in omni terra;

²⁶et ad nullam illarum missus est Elias nisi in Sarepta Sidoniae ad mulierem viduam.

²⁷Et multi leprosi erant in Israel sub Eliseo propheta; et nemo eorum mundatus est nisi Naaman Syrus".

²⁸Et repleti sunt omnes in synagoga ira haec audientes;

²⁹et surrexerunt et eiecerunt illum extra civitatem et duxerunt illum usque ad supercilium montis, supra quem civitas illorum erat aedificata, ut praecipitarent eum.

³⁰Ipse autem transiens per medium illorum ibat.

³¹Et descendit in Capharnaum civitatem Galilaeae. Et docebat illos sabbatis;

³²et stupebant in doctrina eius, quia in potestate erat sermo ipsius.

³³Et in synagoga erat homo habens spiritum daemonii immundi; et exclamavit voce magna:

³⁴" Sine; quid nobis et tibi, Iesu Nazarene? Venisti perdere nos? Scio te qui sis: Sanctus Dei".

³⁵Et increpavit illi Iesus dicens: "Obmutesce et exi ab illo!". Et cum proiecisset illum daemonium in medium, exiit ab illo nihilque illum nocuit.

³⁶Et factus est pavor in omnibus; et colloquebantur ad invicem dicentes: Quod est hoc verbum, quia in potestate et virtute imperat immundis spiritibus, et exeunt?".

³⁷Et divulgabatur fama de illo in omnem locum regionis.

³⁸Surgens autem de synagoga introivit in domum Simonis. Socrus autem Simonis tenebatur magna febri; et rogaverunt illum pro ea.

³⁹Et stans super illam imperavit febri, et dimisit illam; et continuo surgens ministrabat illis.

⁴⁰Cum sol autem occidisset, omnes, qui habebant infirmos variis languoribus, ducebant illos ad eum; at ille singulis manus imponens curabat eos.

⁴¹Exibant autem daemonia a multis clamantia et dicentia: "Tu es Filius Dei". Et increpans non sinebat ea loqui, quia sciebant ipsum esse Christum.

⁴²Facta autem die, egressus ibat in desertum locum; et turbae requirebant eum et venerunt usque ad ipsum et detinebant illum, ne discederet ab eis.

⁴³Quibus ille ait: "Et aliis civitatibus oportet me evangelizare regnum Dei, quia ideo missus sum".

⁴⁴Et erat praedicans in synagogis Iudaeae.