Read Nova_Vulgata DC Evangelium secundum Lucam 6 Bible Online

Evangelium secundum Lucam 6 - Nova_Vulgata DC bible

Evangelium secundum Lucam 6

¹Factum est autem in sabbato, cum transiret per sata, et velle bant discipuli eius spicas et manducabant confricantes manibus.

²Quidam autem pharisaeorum dixerunt: "Quid facitis, quod non licet in sabbatis?".

³Et respondens Iesus ad eos dixit: "Nec hoc legistis, quod fecit David, cum esurisset ipse et qui cum eo erant?

⁴Quomodo intravit in domum Dei et panes propositionis sumpsit et manducavit et dedit his, qui cum ipso erant, quos non licet manducare nisi tantum sacerdotibus?".

⁵Et dicebat illis: "Dominus est sabbati Filius hominis".

⁶Factum est autem in alio sabbato, ut intraret in synagogam et doceret; et erat ibi homo, et manus eius dextra erat arida.

⁷Observabant autem illum scribae et pharisaei, si sabbato curaret, ut invenirent accusare illum.

⁸Ipse vero sciebat cogitationes eorum et ait homini, qui habebat manum aridam: "Surge et sta in medium". Et surgens stetit.

⁹Ait autem ad illos Iesus: "Interrogo vos, si licet sabbato bene facere an male; animam salvam facere an perdere?".

¹⁰Et circumspectis omnibus illis, dixit illi: "Extende manum tuam". Et fecit; et restituta est manus eius.

¹¹Ipsi autem repleti sunt insipientia et colloquebantur ad invicem quidnam facerent Iesu.

¹²Factum est autem in illis diebus, exiit in montem orare et erat pernoctans in oratione Dei.

¹³Et cum dies factus esset, vocavit discipulos suos et elegit Duodecim ex ipsis, quos et apostolos nominavit:

¹⁴Simonem, quem et cognominavit Petrum, et Andream fratrem eius et Iacobum et Ioannem et Philippum et Bartholomaeum

¹⁵et Matthaeum et Thomam et Iacobum Alphaei et Simonem, qui vocatur Zelotes,

¹⁶et Iudam Iacobi et Iudam Iscarioth, qui fuit proditor.

¹⁷Et descendens cum illis stetit in loco campestri, et turba multa discipulorum eius, et multitudo copiosa plebis ab omni Iudaea et Ierusalem et maritima Tyri et Sidonis,

¹⁸qui venerunt, ut audirent eum et sanarentur a languoribus suis; et, qui vexabantur a spiritibus immundis, curabantur.

¹⁹Et omnis turba quaerebant eum tangere, quia virtus de illo exibat et sanabat omnes.

²⁰Et ipse, elevatis oculis suis in discipulos suos, dicebat: Beati pauperes, quia vestrum est regnum Dei.

²¹Beati, qui nunc esuritis, quia saturabimini.Beati, qui nunc fletis, quia ridebitis.

²²Beati eritis, cum vos oderint homines et cum separaverint vos et exprobraverint et eiecerint nomen vestrum tamquam malum propter Filium hominis.

²³Gaudete in illa die et exsultate, ecce enim merces vestra multa in caelo; secundum haec enim faciebant prophetis patres eorum.

²⁴Verumtamen vae vobis divitibus, quia habetis consolationem vestram!

²⁵Vae vobis, qui saturati estis nunc, quia esurietis!Vae vobis, qui ridetis nunc, quia lugebitis et flebitis!

²⁶Vae, cum bene vobis dixerint omnes homines! Secundum haec enim faciebant pseudoprophetis patres eorum.

²⁷Sed vobis dico, qui auditis: Diligite inimicos vestros, bene facite his, qui vos oderunt;

²⁸benedicite male dicentibus vobis, orate pro calumniantibus vos.

²⁹Ei, qui te percutit in maxillam, praebe et alteram; et ab eo, qui aufert tibi vestimentum, etiam tunicam noli prohibere.

³⁰Omni petenti te tribue; et ab eo, qui aufert, quae tua sunt, ne repetas.

³¹Et prout vultis, ut faciant vobis homines, facite illis similiter.

³²Et si diligitis eos, qui vos diligunt, quae vobis est gratia? Nam et peccatores diligentes se diligunt.

³³Et si bene feceritis his, qui vobis bene faciunt, quae vobis est gratia? Si quidem et peccatores idem faciunt.

³⁴Et si mutuum dederitis his, a quibus speratis recipere, quae vobis gratia est? Nam et peccatores peccatoribus fenerantur, ut recipiant aequalia.

³⁵Verumtamen diligite inimicos vestros et bene facite et mutuum date nihil desperantes; et erit merces vestra multa, et eritis filii Altissimi, quia ipse benignus est super ingratos et malos.

³⁶Estote misericordes, sicut et Pater vester misericors est.

³⁷Et nolite iudicare et non iudicabimini; et nolite condemnare et non condemnabimini. Dimittite et dimittemini;

³⁸date, et dabitur vobis: mensuram bonam, confertam, coagitatam, supereffluentem dabunt in sinum vestrum; eadem quippe mensura, qua mensi fueritis, remetietur vobis".

³⁹Dixit autem illis et similitudinem: "Numquid potest caecus caecum ducere? Nonne ambo in foveam cadent?

⁴⁰Non est discipulus super magistrum; perfectus autem omnis erit sicut magister eius.

⁴¹Quid autem vides festucam in oculo fratris tui, trabem autem, quae in oculo tuo est, non consideras?

⁴²Quomodo potes dicere fratri tuo: "Frater, sine eiciam festucam, quae est in oculo tuo", ipse in oculo tuo trabem non videns? Hypocrita, eice primum trabem de oculo tuo et tunc perspicies, ut educas festucam, quae est in oculo fratris tui.

⁴³Non est enim arbor bona faciens fructum malum, neque iterum arbor mala faciens fructum bonum.

⁴⁴Unaquaeque enim arbor de fructu suo cognoscitur; neque enim de spinis colligunt ficus, neque de rubo vindemiant uvam.

⁴⁵Bonus homo de bono thesauro cordis profert bonum, et malus homo de malo profert malum: ex abundantia enim cordis os eius loquitur.

⁴⁶Quid autem vocatis me: "Domine, Domine", et non facitis, quae dico?

⁴⁷Omnis, qui venit ad me et audit sermones meos et facit eos, ostendam vobis cui similis sit:

⁴⁸similis est homini aedificanti domum, qui fodit in altum et posuit fundamentum supra petram; inundatione autem facta, illisum est flumen domui illi et non potuit eam movere; bene enim aedificata erat.

⁴⁹Qui autem audivit et non fecit, similis est homini aedificanti domum suam supra terram sine fundamento; in quam illisus est fluvius, et continuo cecidit, et facta est ruina domus illius magna".