Read Nova_Vulgata DC Evangelium secundum Ioannem 10 Bible Online

Evangelium secundum Ioannem 10 - Nova_Vulgata DC bible

Evangelium secundum Ioannem 10

¹"Amen, amen dico vobis: Qui non intrat per ostium in ovile ovium, sed ascendit aliunde, ille fur est et latro;

²qui autem intrat per ostium, pastor est ovium.

³Huic ostiarius aperit, et oves vocem eius audiunt, et proprias oves vocat nominatim et educit eas.

⁴Cum proprias omnes emiserit, ante eas vadit, et oves illum sequuntur, quia sciunt vocem eius;

⁵alienum autem non sequentur, sed fugient ab eo, quia non noverunt vocem alienorum".

⁶Hoc proverbium dixit eis Iesus; illi autem non cognoverunt quid esset, quod loquebatur eis.

⁷Dixit ergo iterum Iesus: "Amen, amen dico vobis: Ego sum ostium ovium.

⁸Omnes, quotquot venerunt ante me, fures sunt et latrones, sed non audierunt eos oves.

⁹Ego sum ostium; per me, si quis introierit, salvabitur et ingredietur et egredietur et pascua inveniet.

¹⁰Fur non venit, nisi ut furetur et mactet et perdat; ego veni, ut vitam habeant et abundantius habeant.

¹¹Ego sum pastor bonus; bonus pastor animam suam ponit pro ovibus;

¹²mercennarius et, qui non est pastor, cuius non sunt oves propriae, videt lupum venientem et dimittit oves et fugit - et lupus rapit eas et dispergit -

¹³quia mercennarius est et non pertinet ad eum de ovibus.

¹⁴Ego sum pastor bonus et cognosco meas, et cognoscunt me meae,

¹⁵sicut cognoscit me Pater, et ego cognosco Patrem; et animam meam pono pro ovibus.

¹⁶Et alias oves habeo, quae non sunt ex hoc ovili, et illas oportet me adducere, et vocem meam audient et fient unus grex, unus pastor.

¹⁷Propterea me Pater diligit, quia ego pono animam meam, ut iterum sumam eam.

¹⁸Nemo tollit eam a me, sed ego pono eam a meipso. Potestatem habeo ponendi eam et potestatem habeo iterum sumendi eam. Hoc mandatum accepi a Patre meo".

¹⁹Dissensio iterum facta est inter Iudaeos propter sermones hos.

²⁰Dicebant autem multi ex ipsis: "Daemonium habet et insanit! Quid eum auditis?".

²¹Alii dicebant: "Haec verba non sunt daemonium habentis! Numquid daemonium potest caecorum oculos aperire?".

²²Facta sunt tunc Encaenia in Hierosolymis. Hiems erat;

²³et ambulabat Iesus in templo in porticu Salomonis.

²⁴Circumdederunt ergo eum Iudaei et dicebant ei: "Quousque animam nostram tollis? Si tu es Christus, dic nobis palam!".

²⁵Respondit eis Iesus: "Dixi vobis, et non creditis; opera, quae ego facio in nomine Patris mei, haec testimonium perhibent de me.

²⁶Sed vos non creditis, quia non estis ex ovibus meis.

²⁷Oves meae vocem meam audiunt, et ego cognosco eas, et sequuntur me;

²⁸et ego vitam aeternam do eis, et non peribunt in aeternum, et non rapiet eas quisquam de manu mea.

²⁹Pater meus quod dedit mihi, maius omnibus est, et nemo potest rapere de manu Patris.

³⁰Ego et Pater unum sumus".

³¹Sustulerunt iterum lapides Iudaei, ut lapidarent eum.

³²Respondit eis Iesus: "Multa opera bona ostendi vobis ex Patre; propter quod eorum opus me lapidatis?".

³³Responderunt ei Iudaei: "De bono opere non lapidamus te sed de blasphemia, et quia tu, homo cum sis, facis teipsum Deum".

³⁴Respondit eis Iesus: "Nonne scriptum est in lege vestra: "Ego dixi: Dii estis?".

³⁵Si illos dixit deos, ad quos sermo Dei factus est, et non potest solvi Scriptura,

³⁶quem Pater sanctificavit et misit in mundum, vos dicitis: Blasphemas!", quia dixi: Filius Dei sum?

³⁷Si non facio opera Patris mei, nolite credere mihi;

³⁸si autem facio, et si mihi non vultis credere, operibus credite, ut cognoscatis et sciatis quia in me est Pater, et ego in Patre".

³⁹Quaerebant ergo iterum eum prehendere; et exivit de manibus eorum.

⁴⁰Et abiit iterum trans Iordanem in eum locum, ubi erat Ioannes baptizans primum, et mansit illic.

⁴¹Et multi venerunt ad eum et dicebant: "Ioannes quidem signum fecit nullum; omnia autem, quaecumque dixit Ioannes de hoc, vera erant".

⁴²Et multi crediderunt in eum illic.