Read Nova_Vulgata DC Evangelium secundum Ioannem 20 Bible Online

Evangelium secundum Ioannem 20 - Nova_Vulgata DC bible

Evangelium secundum Ioannem 20

¹Prima autem sabbatorum Maria Magdalene venit ma ne, cum adhuc tenebrae essent, ad monumentum et videt lapidem sublatum a monumento.

²Currit ergo et venit ad Simonem Petrum et ad alium discipulum, quem amabat Iesus, et dicit eis: "Tulerunt Dominum de monumento, et nescimus, ubi posuerunt eum!".

³Exiit ergo Petrus et ille alius discipulus, et veniebant ad monumentum.

⁴Currebant autem duo simul, et ille alius discipulus praecucurrit citius Petro et venit primus ad monumentum;

⁵et cum se inclinasset, videt posita linteamina, non tamen introivit.

⁶Venit ergo et Simon Petrus sequens eum et introivit in monumentum; et videt linteamina posita

⁷et sudarium, quod fuerat super caput eius, non cum linteaminibus positum, sed separatim involutum in unum locum.

⁸Tunc ergo introivit et alter discipulus, qui venerat primus ad monumentum, et vidit et credidit.

⁹Nondum enim sciebant Scripturam, quia oportet eum a mortuis resurgere.

¹⁰Abierunt ergo iterum ad semetipsos discipuli.

¹¹Maria autem stabat ad monumentum foris plorans. Dum ergo fleret, inclinavit se in monumentum

¹²et videt duos angelos in albis sedentes, unum ad caput et unum ad pedes, ubi positum fuerat corpus Iesu.

¹³Et dicunt ei illi: "Mulier, quid ploras?". Dicit eis: "Tulerunt Dominum meum, et nescio, ubi posuerunt eum".

¹⁴Haec cum dixisset, conversa est retrorsum et videt Iesum stantem; et non sciebat quia Iesus est.

¹⁵Dicit ei Iesus: "Mulier, quid ploras? Quem quaeris?". Illa, existimans quia hortulanus esset, dicit ei: "Domine, si tu sustulisti eum, dicito mihi, ubi posuisti eum, et ego eum tollam".

¹⁶Dicit ei Iesus: "Maria!". Conversa illa dicit ei Hebraice: "Rabbuni! - quod dicitur Magister C.

¹⁷Dicit ei Iesus: "Iam noli me tenere, nondum enim ascendi ad Patrem; vade autem ad fratres meos et dic eis: Ascendo ad Patrem meum et Patrem vestrum, et Deum meum et Deum vestrum".

¹⁸Venit Maria Magdalene annuntians discipulis: "Vidi Dominum! ", et quia haec dixit ei.

¹⁹Cum esset ergo sero die illa prima sabbatorum, et fores essent clausae, ubi erant discipuli, propter metum Iudaeorum, venit Iesus et stetit in medio et dicit eis: "Pax vobis!".

²⁰Et hoc cum dixisset, ostendit eis manus et latus. Gavisi sunt ergo discipuli, viso Domino.

²¹Dixit ergo eis iterum: "Pax vobis! Sicut misit me Pater, et ego mitto vos".

²²Et cum hoc dixisset, insufflavit et dicit eis: "Accipite Spiritum Sanctum.

²³Quorum remiseritis peccata, remissa sunt eis; quorum retinueritis, retenta sunt".

²⁴Thomas autem, unus ex Duodecim, qui dicitur Didymus, non erat cum eis, quando venit Iesus.

²⁵Dicebant ergo ei alii discipuli: "Vidimus Dominum!". Ille autem dixit eis: "Nisi videro in manibus eius signum clavorum et mittam digitum meum in signum clavorum et mittam manum meam in latus eius, non credam".

²⁶Et post dies octo iterum erant discipuli eius intus, et Thomas cum eis. Venit Iesus ianuis clausis et stetit in medio et dixit: "Pax vobis!".

²⁷Deinde dicit Thomae: "Infer digitum tuum huc et vide manus meas et affer manum tuam et mitte in latus meum; et noli fieri incredulus sed fidelis!".

²⁸Respondit Thomas et dixit ei: "Dominus meus et Deus meus!".

²⁹Dicit ei Iesus: "Quia vidisti me, credidisti. Beati, qui non viderunt et crediderunt!".

³⁰Multa quidem et alia signa fecit Iesus in conspectu discipulorum suorum, quae non sunt scripta in libro hoc;

³¹haec autem scripta sunt, ut credatis quia Iesus est Christus Filius Dei et ut credentes vitam habeatis in nomine eius.