Read Nova_Vulgata DC Evangelium secundum Ioannem 9 Bible Online

Evangelium secundum Ioannem 9 - Nova_Vulgata DC bible

Evangelium secundum Ioannem 9

¹Et praeteriens vidit hominem caecum a nativitate.

²Et interro gaverunt eum discipuli sui dicentes: "Rabbi, quis peccavit, hic aut parentes eius, ut caecus nasceretur?".

³Respondit Iesus: "Neque hic peccavit neque parentes eius, sed ut manifestentur opera Dei in illo.

⁴Nos oportet operari opera eius, qui misit me, donec dies est; venit nox, quando nemo potest operari.

⁵Quamdiu in mundo sum, lux sum mundi".

⁶Haec cum dixisset, exspuit in terram et fecit lutum ex sputo et linivit lutum super oculos eius

⁷et dixit ei: "Vade, lava in natatoria Siloae!" - quod interpretatur Missus C. Abiit ergo et lavit et venit videns.

⁸Itaque vicini et, qui videbant eum prius quia mendicus erat, dicebant: "Nonne hic est, qui sedebat et mendicabat? ";

⁹alii dicebant: "Hic est! "; alii dicebant: "Nequaquam, sed similis est eius!". Ille dicebat: "Ego sum!".

¹⁰Dicebant ergo ei: "Quomodo igitur aperti sunt oculi tibi?".

¹¹Respondit ille: "Homo, qui dicitur Iesus, lutum fecit et unxit oculos meos et dixit mihi: "Vade ad Siloam et lava!". Abii ergo et lavi et vidi.

¹²Et dixerunt ei: "Ubi est ille?". Ait: "Nescio".

¹³Adducunt eum ad pharisaeos, qui caecus fuerat.

¹⁴Erat autem sabbatum, in qua die lutum fecit Iesus et aperuit oculos eius.

¹⁵Iterum ergo interrogabant et eum pharisaei quomodo vidisset. Ille autem dixit eis: "Lutum posuit super oculos meos, et lavi et video".

¹⁶Dicebant ergo ex pharisaeis quidam: "Non est hic homo a Deo, quia sabbatum non custodit! "; alii autem dicebant: "Quomodo potest homo peccator haec signa facere?". Et schisma erat in eis.

¹⁷Dicunt ergo caeco iterum: "Tu quid dicis de eo quia aperuit oculos tuos?". Ille autem dixit: "Propheta est!".

¹⁸Non crediderunt ergo Iudaei de illo quia caecus fuisset et vidisset, donec vocaverunt parentes eius, qui viderat.

¹⁹Et interrogaverunt eos dicentes: "Hic est filius vester, quem vos dicitis quia caecus natus est? Quomodo ergo nunc videt?".

²⁰Responderunt ergo parentes eius et dixerunt: "Scimus quia hic est filius noster et quia caecus natus est.

²¹Quomodo autem nunc videat nescimus, aut quis eius aperuit oculos nos nescimus; ipsum interrogate. Aetatem habet; ipse de se loquetur!".

²²Haec dixerunt parentes eius, quia timebant Iudaeos; iam enim conspiraverant Iudaei, ut, si quis eum confiteretur Christum, extra synagogam fieret.

²³Propterea parentes eius dixerunt: "Aetatem habet; ipsum interrogate!.

²⁴Vocaverunt ergo rursum hominem, qui fuerat caecus, et dixerunt ei: "Da gloriam Deo! Nos scimus quia hic homo peccator est".

²⁵Respondit ergo ille: "Si peccator est nescio; unum scio quia, caecus cum essem, modo video".

²⁶Dixerunt ergo illi: "Quid fecit tibi? Quomodo aperuit oculos tuos?".

²⁷Respondit eis: "Dixi vobis iam, et non audistis; quid iterum vultis audire? Numquid et vos vultis discipuli eius fieri?".

²⁸Et maledixerunt ei et dixerunt: "Tu discipulus illius es, nos autem Moysis discipuli sumus.

²⁹Nos scimus quia Moysi locutus est Deus; hunc autem nescimus unde sit".

³⁰Respondit homo et dixit eis: "In hoc enim mirabile est, quia vos nescitis unde sit, et aperuit meos oculos!

³¹Scimus quia peccatores Deus non audit; sed, si quis Dei cultor est et voluntatem eius facit, hunc exaudit.

³²A saeculo non est auditum quia aperuit quis oculos caeci nati;

³³nisi esset hic a Deo, non poterat facere quidquam".

³⁴Responderunt et dixerunt ei: "In peccatis tu natus es totus et tu doces nos?". Et eiecerunt eum foras.

³⁵Audivit Iesus quia eiecerunt eum foras et, cum invenisset eum, dixit ei: "Tu credis in Filium hominis?".

³⁶Respondit ille et dixit: "Et quis est, Domine, ut credam in eum?".

³⁷Dixit ei Iesus: "Et vidisti eum; et, qui loquitur tecum, ipse est".

³⁸At ille ait: "Credo, Domine! "; et adoravit eum.

³⁹Et dixit Iesus: "In iudicium ego in hunc mundum veni, ut, qui non vident, videant, et, qui vident, caeci fiant".

⁴⁰Audierunt haec ex pharisaeis, qui cum ipso erant, et dixerunt ei: "Numquid et nos caeci sumus?".

⁴¹Dixit eis Iesus: "Si caeci essetis, non haberetis peccatum. Nunc vero dicitis: "Videmus!"; peccatum vestrum manet".