Read Nova_Vulgata DC Actus Apostolorum 15 Bible Online

Actus Apostolorum 15 - Nova_Vulgata DC bible

Actus Apostolorum 15

¹Et quidam descendentes de Iudaea docebant fratres: "Nisi circumcidamini secundum morem Moysis, non potestis salvi fieri".

²Facta autem seditione et conquisitione non minima Paulo et Barnabae adversum illos, statuerunt, ut ascenderent Paulus et Barnabas et quidam alii ex illis ad apostolos et presbyteros in Ierusalem super hac quaestione.

³Illi igitur deducti ab ecclesia pertransiebant Phoenicen et Samariam narrantes conversionem gentium et faciebant gaudium magnum omnibus fratribus.

⁴Cum autem venissent Hierosolymam, suscepti sunt ab ecclesia et apostolis et presbyteris et annuntiaverunt quanta Deus fecisset cum illis.

⁵Surrexerunt autem quidam de haeresi pharisaeorum, qui crediderant, dicentes: "Oportet circumcidere eos, praecipere quoque servare legem Moysis!".

⁶Conveneruntque apostoli et presbyteri videre de verbo hoc.

⁷Cum autem magna conquisitio fieret, surgens Petrus dixit ad eos: "Viri fratres, vos scitis quoniam ab antiquis diebus in vobis elegit Deus per os meum audire gentes verbum evangelii et credere;

⁸et qui novit corda, Deus, testimonium perhibuit illis dans Spiritum Sanctum sicut et nobis;

⁹et nihil discrevit inter nos et illos fide purificans corda eorum.

¹⁰Nunc ergo quid tentatis Deum imponere iugum super cervicem discipulorum, quod neque patres nostri neque nos portare potuimus?

¹¹Sed per gratiam Domini Iesu credimus salvari quemadmodum et illi".

¹²Tacuit autem omnis multitudo, et audiebant Barnabam et Paulum narrantes quanta fecisset Deus signa et prodigia in gentibus per eos.

¹³Et postquam tacuerunt, respondit Iacobus dicens: "Viri fratres, audite me.

¹⁴Simeon narravit quemadmodum primum Deus visitavit sumere ex gentibus populum nomini suo;

¹⁵et huic concordant verba Prophetarum, sicut scriptum est:

¹⁶"Post haec revertaret reaedificabo tabernaculum David, quod decidit,et diruta eius reaedificabo et erigam illud.

¹⁷ut requirant reliqui hominum Dominumet omnes gentes, super quas invocatum est nomen meum,dicit Dominus faciens haec

¹⁸nota a saeculo".

¹⁹Propter quod ego iudico non inquietari eos, qui ex gentibus convertuntur ad Deum,

²⁰sed scribere ad eos, ut abstineant se a contaminationibus simulacrorum et fornicatione et suffocato et sanguine.

²¹Moyses enim a generationibus antiquis habet in singulis civitatibus, qui eum praedicent in synagogis, ubi per omne sabbatum legitur".

²²Tunc placuit apostolis et presbyteris cum omni ecclesia electos viros ex eis mittere Antiochiam cum Paulo et Barnaba: Iudam, qui cognominatur Barsabbas, et Silam, viros primos in fratribus,

²³scribentes per manum eorum: "Apostoli et presbyteri fratres his, qui sunt Antiochiae et Syriae et Ciliciae, fratribus ex gentibus, salutem!

²⁴Quoniam audivimus quia quidam ex nobis, quibus non mandavimus, exeuntes turbaverunt vos verbis evertentes animas vestras,

²⁵placuit nobis collectis in unum eligere viros et mittere ad vos cum carissimis nobis Barnaba et Paulo,

²⁶hominibus, qui tradiderunt animas suas pro nomine Domini nostri Iesu Christi.

²⁷Misimus ergo Iudam et Silam, qui et ipsi verbis referent eadem.

²⁸Visum est enim Spiritui Sancto et nobis nihil ultra imponere vobis oneris quam haec necessario:

²⁹abstinere ab idolothytis et sanguine et suffocatis et fornicatione; a quibus custodientes vos bene agetis. Valete".

³⁰Illi igitur dimissi descenderunt Antiochiam et, congregata multitudine, tradiderunt epistulam;

³¹quam cum legissent, gavisi sunt super consolatione.

³²Iudas quoque et Silas, cum et ipsi essent prophetae, verbo plurimo consolati sunt fratres et confirmaverunt.

³³Facto autem tempore, dimissi sunt cum pace a fratribus ad eos, qui miserant illos.

³⁵Paulus autem et Barnabas demorabantur Antiochiae docentes et evangelizantes cum aliis pluribus verbum Domini.

³⁶Post aliquot autem dies dixit ad Barnabam Paulus: "Revertentes visitemus fratres per universas civitates, in quibus praedicavimus verbum Domini, quomodo se habeant".

³⁷Barnabas autem volebat secum assumere et Ioannem, qui cognominatur Marcus;

³⁸Paulus autem iudicabat eum, qui discessisset ab eis a Pamphylia et non isset cum eis in opus, non debere recipi eum.

³⁹Facta est autem exacerbatio, ita ut discederent ab invicem, et Barnabas, assumpto Marco, navigaret Cyprum.

⁴⁰Paulus vero, electo Sila, profectus est, traditus gratiae Domini a fratribus;

⁴¹perambulabat autem Syriam et Ciliciam confirmans ecclesias.