Read Nova_Vulgata DC Actus Apostolorum 21 Bible Online

Actus Apostolorum 21 - Nova_Vulgata DC bible

Actus Apostolorum 21

¹Cum autem factum esset, ut navigaremus abstracti ab eis, recto cursu venimus Cho et sequenti die Rhodum et inde Patara;

²et cum invenissemus navem transfretantem in Phoenicen, ascendentes navigavimus.

³Cum paruissemus autem Cypro, et relinquentes eam ad sinistram navigabamus in Syriam et venimus Tyrum, ibi enim navis erat expositura onus.

⁴Inventis autem discipulis, mansimus ibi diebus septem; qui Paulo dicebant per Spiritum, ne iret Hierosolymam.

⁵Et explicitis diebus, profecti ibamus, deducentibus nos omnibus cum uxoribus et filiis usque foras civitatem; et positis genibus in litore orantes,

⁶valefecimus invicem et ascendimus in navem; illi autem redierunt in sua.

⁷Nos vero, navigatione explicita, a Tyro devenimus Ptolemaida et, salutatis fratribus, mansimus die una apud illos.

⁸Alia autem die profecti venimus Caesaream et intrantes in domum Philippi evangelistae, qui erat de septem, mansimus apud eum.

⁹Huic autem erant filiae quattuor virgines prophetantes.

¹⁰Et cum moraremur plures dies, supervenit quidam a Iudaea propheta nomine Agabus;

¹¹is cum venisset ad nos et tulisset zonam Pauli, alligans sibi pedes et manus dixit: "Haec dicit Spiritus Sanctus: Virum, cuius est zona haec, sic alligabunt in Ierusalem Iudaei et tradent in manus gentium".

¹²Quod cum audissemus, rogabamus nos et, qui loci illius erant, ne ipse ascenderet Ierusalem.

¹³Tunc respondit Paulus: "Quid facitis flentes et affligentes cor meum? Ego enim non solum alligari sed et mori in Ierusalem paratus sum propter nomen Domini Iesu".

¹⁴Et cum ei suadere non possemus, quievimus dicentes: "Domini voluntas fiat!".

¹⁵Post dies autem istos praeparati ascendebamus Hierosolymam;

¹⁶venerunt autem et ex discipulis a Caesarea nobiscum adducentes apud quem hospitaremur, Mnasonem quendam Cyprium, antiquum discipulum.

¹⁷Et cum venissemus Hierosolymam, libenter exceperunt nos fratres.

¹⁸Sequenti autem die introibat Paulus nobiscum ad Iacobum, omnesque collecti sunt presbyteri.

¹⁹Quos cum salutasset, narrabat per singula, quae fecisset Deus in gentibus per ministerium ipsius.

²⁰At illi cum audissent, glorificabant Deum dixeruntque ei: "Vides, frater, quot milia sint in Iudaeis, qui crediderunt, et omnes aemulatores sunt legis;

²¹audierunt autem de te quia discessionem doceas a Moyse omnes, qui per gentes sunt, Iudaeos, dicens non debere circumcidere eos filios suos neque secundum consuetudines ambulare.

²²Quid ergo est? Utique audient te supervenisse.

²³Hoc ergo fac, quod tibi dicimus. Sunt nobis viri quattuor votum habentes super se;

²⁴his assumptis, sanctifica te cum illis et impende pro illis, ut radant capita, et scient omnes quia, quae de te audierunt, nihil sunt, sed ambulas et ipse custodiens legem.

²⁵De his autem, qui crediderunt, gentibus nos scripsimus iudicantes, ut abstineant ab idolothyto et sanguine et suffocato et fornicatione".

²⁶Tunc Paulus, assumptis viris, postera die purificatus cum illis intravit in templum annuntians expletionem dierum purificationis, donec offerretur pro unoquoque eorum oblatio.

²⁷Dum autem septem dies consummarentur, hi, qui de Asia erant, Iudaei cum vidissent eum in templo, concitaverunt omnem turbam et iniecerunt ei manus

²⁸clamantes: "Viri Israelitae, adiuvate! Hic est homo, qui adversus populum et legem et locum hunc omnes ubique docens, insuper et Graecos induxit in templum et polluit sanctum locum istum".

²⁹Viderant enim Trophimum Ephesium in civitate cum ipso, quem aestimabant quoniam in templum induxisset Paulus.

³⁰Commotaque est civitas tota, et facta est concursio populi, et apprehendentes Paulum trahebant eum extra templum, et statim clausae sunt ianuae.

³¹Quaerentibus autem eum occidere, nuntiatum est tribuno cohortis quia tota confunditur Ierusalem,

³²qui statim, assumptis militibus et centurionibus, decucurrit ad illos; qui cum vidissent tribunum et milites, cessaverunt percutere Paulum.

³³Tunc accedens tribunus apprehendit eum et iussit alligari catenis duabus et interrogabat quis esset et quid fecisset.

³⁴Alii autem aliud clamabant in turba; et cum non posset certum cognoscere prae tumultu, iussit duci eum in castra.

³⁵Et cum venisset ad gradus, contigit ut portaretur a militibus propter vim turbae;

³⁶sequebatur enim multitudo populi clamantes: "Tolle eum!".

³⁷Et cum coepisset induci in castra, Paulus dicit tribuno: "Si licet mihi loqui aliquid ad te?". Qui dixit: "Graece nosti?

³⁸Nonne tu es Aegyptius, qui ante hos dies tumultum concitasti et eduxisti in desertum quattuor milia virorum sicariorum?".

³⁹Et dixit Paulus: "Ego homo sum quidem Iudaeus a Tarso Ciliciae, non ignotae civitatis municeps; rogo autem te, permitte mihi loqui ad populum.

⁴⁰Et cum ille permisisset, Paulus stans in gradibus annuit manu ad plebem et, magno silentio facto, allocutus est Hebraea lingua dicens: