Read Nova_Vulgata DC Epistula ad Romanos 10 Bible Online

Epistula ad Romanos 10 - Nova_Vulgata DC bible

Epistula ad Romanos 10

¹Fratres, voluntas quidem cordis mei et obsecratio ad Deum pro illis in salutem.

²Testimonium enim perhibeo illis quod aemulationem Dei habent sed non secundum scientiam;

³ignorantes enim Dei iustitiam et suam iustitiam quaerentes statuere, iustitiae Dei non sunt subiecti;

⁴finis enim legis Christus ad iustitiam omni credenti.

⁵Moyses enim scribit de iustitia, quae ex lege est: "Qui fecerit homo, vivet in eis".

⁶Quae autem ex fide est iustitia, sic dicit: "Ne dixeris in corde tuo: Quis ascendet in caelum?", id est Christum deducere;

⁷aut: "Quis descendet in abyssum? ", hoc est Christum ex mortuis revocare.

⁸Sed quid dicit? " Prope te est verbum, in ore tuo et in corde tuo "; hoc est verbum fidei, quod praedicamus.

⁹Quia si confitearis in ore tuo: "Dominum Iesum! ", et in corde tuo credideris quod Deus illum excitavit ex mortuis, salvus eris.

¹⁰Corde enim creditur ad iustitiam, ore autem confessio fit in salutem.

¹¹Dicit enim Scriptura: Omnis, qui credit in illo, non confundetur".

¹²Non enim est distinctio Iudaei et Graeci, nam idem Dominus omnium, dives in omnes, qui invocant illum:

¹³Omnis enim, quicumque invocaverit nomen Domini, salvus erit.

¹⁴Quomodo ergo invocabunt, in quem non crediderunt? Aut quomodo credent ei, quem non audierunt? Quomodo autem audient sine praedicante?

¹⁵Quomodo vero praedicabunt nisi mittantur? Sicut scriptum est: Quam speciosi pedes evangelizantium bona".

¹⁶Sed non omnes oboedierunt evangelio; Isaias enim dicit: Domine, quis credidit auditui nostro?".

¹⁷Ergo fides ex auditu, auditus autem per verbum Christi.

¹⁸Sed dico: Numquid non audierunt? Quin immo,in omnem terram exiit sonus eorum,et in fines orbis terrae verba eorum.

¹⁹Sed dico: Numquid Israel non cognovit? Primus Moyses dicit: Ego ad aemulationem vos adducam per Non gentem:per gentem insipientem ad iram vos provocabo".

²⁰Isaias autem audet et dicit: "Inventus sum in non quaerentibus me; palam apparui his, qui me non interrogabant".

²¹Ad Israel autem dicit: "Tota die expandi manus meas ad populum non credentem et contradicentem".