Read Nova_Vulgata DC Epistula ad Romanos 16 Bible Online

Epistula ad Romanos 16 - Nova_Vulgata DC bible

Epistula ad Romanos 16

¹Commendo autem vobis Phoebem sororem nostram, quae est ministra ecclesiae, quae est Cenchreis,

²ut eam suscipiatis in Domino digne sanctis et assistatis ei in quocumque negotio vestri indiguerit; etenim ipsa astitit multis et mihi ipsi.

³Salutate Priscam et Aquilam adiutores meos in Christo Iesu,

⁴qui pro anima mea suas cervices supposuerunt, quibus non solus ego gratias ago sed et cunctae ecclesiae gentium;

⁵et domesticam eorum ecclesiam.Salutate Epaenetum dilectum mihi, primitias Asiae in Christo.

⁶Salutate Mariam, quae multum laboravit in vobis.

⁷Salutate Andronicum et Iuniam cognatos meos et concaptivos meos, qui sunt nobiles in apostolis, qui et ante me fuerunt in Christo.

⁸Salutate Ampliatum dilectissimum mihi in Domino.

⁹Salutate Urbanum adiutorem nostrum in Christo et Stachyn dilectum meum.

¹⁰Salutate Apellem probatum in Christo. Salutate eos, qui sunt ex Aristobuli.

¹¹Salutate Herodionem cognatum meum. Salutate eos, qui sunt ex Narcissi, qui sunt in Domino.

¹²Salutate Tryphaenam et Tryphosam, quae laborant in Domino. Salutate Persidam carissimam, quae multum laboravit in Domino.

¹³Salutate Rufum electum in Domino et matrem eius et meam.

¹⁴Salutate Asyncritum, Phlegonta, Hermen, Patrobam, Hermam et, qui cum eis sunt, fratres.

¹⁵Salutate Philologum et Iuliam, Nereum et sororem eius et Olympam et omnes, qui cum eis sunt, sanctos.

¹⁶Salutate invicem in osculo sancto. Salutant vos omnes ecclesiae Christi.

¹⁷Rogo autem vos, fratres, ut observetis eos, qui dissensiones et offendicula praeter doctrinam, quam vos didicistis, faciunt, et declinate ab illis;

¹⁸huiusmodi enim Domino nostro Christo non serviunt sed suo ventri, et per dulces sermones et benedictiones seducunt corda innocentium.

¹⁹Vestra enim oboedientia ad omnes pervenit; gaudeo igitur in vobis, sed volo vos sapientes esse in bono et simplices in malo.

²⁰Deus autem pacis conteret Satanam sub pedibus vestris velociter.Gratia Domini nostri Iesu vobiscum.

²¹Salutat vos Timotheus adiutor meus et Lucius et Iason et Sosipater cognati mei.

²²Saluto vos ego Tertius, qui scripsi epistulam in Domino.

²³Salutat vos Gaius hospes meus et universae ecclesiae. Salutat vos Erastus arcarius civitatis et Quartus frater.

²⁵Ei autem, qui potens est vos confirmare iuxta evangelium meum et praedicationem Iesu Christi secundum revelationem mysterii temporibus aeternis taciti,

²⁶manifestati autem nunc, et per scripturas Prophetarum secundum praeceptum aeterni Dei ad oboeditionem fidei in cunctis gentibus patefacti,

²⁷soli sapienti Deo per Iesum Christum, cui gloria in saecula. Amen.