Read Nova_Vulgata DC Epistula ad Romanos 2 Bible Online

Epistula ad Romanos 2 - Nova_Vulgata DC bible

Epistula ad Romanos 2

¹Propter quod inexcusabilis es, o homo omnis, qui iudicas. In quo enim iudicas alterum, teipsum condemnas; eadem enim agis, qui iudicas.

²Scimus enim quoniam iudicium Dei est secundum veritatem in eos, qui talia agunt.

³Existimas autem hoc, o homo, qui iudicas eos, qui talia agunt, et facis ea, quia tu effugies iudicium Dei?

⁴An divitias benignitatis eius et patientiae et longanimitatis contemnis, ignorans quoniam benignitas Dei ad paenitentiam te adducit?

⁵Secundum duritiam autem tuam et impaenitens cor thesaurizas tibi iram in die irae et revelationis iusti iudicii Dei,

⁶qui reddet unicuique secundum opera eius:

⁷his quidem, qui secundum patientiam boni operis gloriam et honorem et incorruptionem quaerunt, vitam aeternam;

⁸his autem, qui ex contentione et non oboediunt veritati, oboediunt autem iniquitati, ira et indignatio.

⁹Tribulatio et angustia in omnem animam hominis operantis malum, Iudaei primum et Graeci;

¹⁰gloria autem et honor et pax omni operanti bonum, Iudaeo primum et Graeco.

¹¹Non est enim personarum acceptio apud Deum!

¹²Quicumque enim sine lege peccaverunt, sine lege et peribunt; et, quicumque in lege peccaverunt, per legem iudicabuntur.

¹³Non enim auditores legis iusti sunt apud Deum, sed factores legis iustificabuntur.

¹⁴Cum enim gentes, quae legem non habent, naturaliter, quae legis sunt, faciunt, eiusmodi legem non habentes ipsi sibi sunt lex;

¹⁵qui ostendunt opus legis scriptum in cordibus suis, testimonium simul reddente illis conscientia ipsorum, et inter se invicem cogitationibus accusantibus aut etiam defendentibus,

¹⁶in die, cum iudicabit Deus occulta hominum secundum evangelium meum per Christum Iesum.

¹⁷Si autem tu Iudaeus cognominaris et requiescis in lege et gloriaris in Deo,

¹⁸et nosti Voluntatem et discernis potiora instructus per legem,

¹⁹et confidis teipsum ducem esse caecorum, lumen eorum, qui in tenebris sunt,

²⁰eruditorem insipientium, magistrum infantium, habentem formam scientiae et veritatis in lege.

²¹Qui ergo alium doces, teipsum non doces? Qui praedicas non furandum, furaris?

²²Qui dicis non moechandum, moecharis? Qui abominaris idola, templa spolias?

²³Qui in lege gloriaris, per praevaricationem legis Deum inhonoras?

²⁴" Nomen enim Dei propter vos blasphematur inter gentes ", sicut scriptum est.

²⁵Circumcisio quidem prodest, si legem observes; si autem praevaricator legis sis, circumcisio tua praeputium facta est.

²⁶Si igitur praeputium iustitias legis custodiat, nonne praeputium illius in circumcisionem reputabitur?

²⁷Et iudicabit, quod ex natura est praeputium legem consummans, te, qui per litteram et circumcisionem praevaricator legis es.

²⁸Non enim qui manifesto Iudaeus est, neque quae manifesto in carne circumcisio,

²⁹sed qui in abscondito Iudaeus est, et circumcisio cordis in spiritu non littera, cuius laus non ex hominibus sed ex Deo est.