Read Nova_Vulgata DC Epistula ad Romanos 3 Bible Online

Epistula ad Romanos 3 - Nova_Vulgata DC bible

Epistula ad Romanos 3

¹Quid ergo amplius est Iudaeo, aut quae utilitas circumcisionis?

²Multum per omnem modum. Primum quidem, quia credita sunt illis eloquia Dei.

³Quid enim, si quidam non crediderunt? Numquid incredulitas illorum fidem Dei evacuabit?

⁴Absit! Exstet autem Deus verax, omnis autem homo mendax, sicut scriptum est: "Ut iustificeris in sermonibus tuis et vincas cum iudicaris".

⁵Si autem iniustitia nostra iustitiam Dei commendat, quid dicemus? Numquid iniustus Deus, qui infert iram? Secundum hominem dico.

⁶Absit! Alioquin quomodo iudicabit Deus mundum?

⁷Si enim veritas Dei in meo mendacio abundavit in gloriam ipsius, quid adhuc et ego tamquam peccator iudicor?

⁸Et non, sicut blasphemamur, et sicut aiunt quidam nos dicere: "Faciamus mala, ut veniant bona "? Quorum damnatio iusta est.

⁹Quid igitur? Praecellimus eos? Nequaquam! Antea enim causati sumus Iudaeos et Graecos omnes sub peccato esse,

¹⁰sicut scriptum est: Non est iustus quisquam,

¹¹non est intellegens, non est requirens Deum.

¹²Omnes declinaverunt, simul inutiles facti sunt;non est qui faciat bonum, non est usque ad unum.

¹³Sepulcrum patens est guttur eorum,linguis suis dolose agebant,venenum aspidum sub labiis eorum,

¹⁴quorum os maledictione et amaritudine plenum est;

¹⁵veloces pedes eorum ad effundendum sanguinem,

¹⁶contritio et infelicitas in viis eorum,

¹⁷et viam pacis non cognoverunt.

¹⁸Non est timor Dei ante oculos eorum".

¹⁹Scimus autem quoniam, quaecumque lex loquitur, his, qui in lege sunt, loquitur, ut omne os obstruatur, et obnoxius fiat omnis mundus Deo;

²⁰quia ex operibus legis non iustificabitur omnis caro coram illo, per legem enim cognitio peccati.

²¹Nunc autem sine lege iustitia Dei manifestata est, testificata a Lege et Prophetis,

²²iustitia autem Dei per fidem Iesu Christi, in omnes, qui credunt. Non enim est distinctio:

²³omnes enim peccaverunt et egent gloria Dei,

²⁴iustificati gratis per gratiam ipsius per redemptionem, quae est in Christo Iesu;

²⁵quem proposuit Deus propitiatorium per fidem in sanguine ipsius ad ostensionem iustitiae suae, cum praetermisisset praecedentia delicta

²⁶in sustentatione Dei, ad ostensionem iustitiae eius in hoc tempore, ut sit ipse iustus et iustificans eum, qui ex fide est Iesu.

²⁷Ubi est ergo gloriatio? Exclusa est. Per quam legem? Operum? Non, sed per legem fidei.

²⁸Arbitramur enim iustificari hominem per fidem sine operibus legis.

²⁹An Iudaeorum Deus tantum? Nonne et gentium? Immo et gentium,

³⁰quoniam quidem unus Deus, qui iustificabit circumcisionem ex fide et praeputium per fidem.

³¹Legem ergo destruimus per fidem? Absit, sed legem statuimus.