Read Nova_Vulgata DC Epistula I ad Corinthios 16 Bible Online

Epistula I ad Corinthios 16 - Nova_Vulgata DC bible

Epistula I ad Corinthios 16

¹De collectis autem, quae fiunt in sanctos, sicut ordina vi ecclesiis Galatiae, ita et vos facite.

²Per primam sabbati unusquisque vestrum apud se ponat recondens, quod ei beneplacuerit, ut non, cum venero, tunc collectae fiant.

³Cum autem praesens fuero, quos probaveritis, per epistulas hos mittam perferre gratiam vestram in Ierusalem;

⁴quod si dignum fuerit, ut et ego eam, mecum ibunt.

⁵Veniam autem ad vos, cum Macedoniam pertransiero, nam Macedoniam pertransibo;

⁶apud vos autem forsitan manebo vel etiam hiemabo, ut vos me deducatis, quocumque iero.

⁷Nolo enim vos modo in transitu videre; spero enim me aliquantum temporis manere apud vos, si Dominus permiserit.

⁸Permanebo autem Ephesi usque ad Pentecosten;

⁹ostium enim mihi apertum est magnum et efficax, et adversarii multi.

¹⁰Si autem venerit Timotheus, videte, ut sine timore sit apud vos, opus enim Domini operatur, sicut et ego;

¹¹ne quis ergo illum spernat. Deducite autem illum in pace, ut veniat ad me; exspecto enim illum cum fratribus.

¹²De Apollo autem fratre, multum rogavi eum, ut veniret ad vos cum fratribus, et utique non fuit voluntas, ut nunc veniret; veniet autem, cum ei opportunum fuerit.

¹³Vigilate, state in fide, viriliter agite, confortamini;

¹⁴omnia vestra in caritate fiant.

¹⁵Obsecro autem vos, fratres: nostis domum Stephanae, quoniam sunt primitiae Achaiae et in ministerium sanctorum ordinaverunt seipsos;

¹⁶ut et vos subditi sitis eiusmodi et omni cooperanti et laboranti.

¹⁷Gaudeo autem in praesentia Stephanae et Fortunati et Achaici, quoniam id quod vobis deerat, ipsi suppleverunt;

¹⁸refecerunt enim et meum spiritum et vestrum. Cognoscite ergo, qui eiusmodi sunt.

¹⁹Salutant vos ecclesiae Asiae. Salutant vos in Domino multum Aquila et Prisca cum domestica sua ecclesia.

²⁰Salutant vos fratres omnes. Salutate invicem in osculo sancto.

²¹Salutatio mea manu Pauli.

²²Si quis non amat Dominum, sit anathema. Marana tha!

²³Gratia Domini Iesu vobiscum.

²⁴Caritas mea cum omnibus vobis in Christo Iesu.