Read Nova_Vulgata DC Epistula I ad Corinthios 3 Bible Online

Epistula I ad Corinthios 3 - Nova_Vulgata DC bible

Epistula I ad Corinthios 3

¹Et ego, fratres, non potui vobis loqui quasi spiritalibus sed qua si carnalibus, tamquam parvulis in Christo.

²Lac vobis potum dedi, non escam, nondum enim poteratis. Sed ne nunc quidem potestis,

³adhuc enim estis carnales. Cum enim sit inter vos zelus et contentio, nonne carnales estis et secundum hominem ambulatis?

⁴Cum enim quis dicit: "Ego quidem sum Pauli ", alius autem: "Ego Apollo, nonne homines estis?

⁵Quid igitur est Apollo? Quid vero Paulus? Ministri, per quos credidistis, et unicuique sicut Dominus dedit.

⁶Ego plantavi, Apollo rigavit, sed Deus incrementum dedit;

⁷itaque neque qui plantat, est aliquid, neque qui rigat, sed qui incrementum dat, Deus.

⁸Qui plantat autem et qui rigat unum sunt; unusquisque autem propriam mercedem accipiet secundum suum laborem.

⁹Dei enim sumus adiutores: Dei agri cultura estis, Dei aedificatio estis.

¹⁰Secundum gratiam Dei, quae data est mihi, ut sapiens architectus fundamentum posui; alius autem superaedificat. Unusquisque autem videat quomodo superaedificet;

¹¹fundamentum enim aliud nemo potest ponere praeter id, quod positum est, qui est Iesus Christus.

¹²Si quis autem superaedificat supra fundamentum aurum, argentum, lapides pretiosos, ligna, fenum, stipulam,

¹³uniuscuiusque opus manifestum erit; dies enim declarabit: quia in igne revelatur, et uniuscuiusque opus quale sit ignis probabit.

¹⁴Si cuius opus manserit, quod superaedificavit, mercedem accipiet;

¹⁵si cuius opus arserit, detrimentum patietur, ipse autem salvus erit, sic tamen quasi per ignem.

¹⁶Nescitis quia templum Dei estis, et Spiritus Dei habitat in vobis?

¹⁷Si quis autem templum Dei everterit, evertet illum Deus; templum enim Dei sanctum est, quod estis vos.

¹⁸Nemo se seducat; si quis videtur sapiens esse inter vos in hoc saeculo, stultus fiat, ut sit sapiens.

¹⁹Sapientia enim huius mundi stultitia est apud Deum. Scriptum est enim: Qui apprehendit sapientes in astutia eorum ";

²⁰et iterum: Dominus novit cogitationes sapientium,quoniam vanae sunt".

²¹Itaque nemo glorietur in hominibus. Omnia enim vestra sunt,

²²sive Paulus sive Apollo sive Cephas sive mundus sive vita sive mors sive praesentia sive futura, omnia enim vestra sunt,

²³vos autem Christi, Christus autem Dei.